DAVAO CITY (Midnanao Examiner / Feb. 18, 2013) – Isip tubag sa naunang desisyon sa National Democratic Front-Southern Mindanao nga irelis ang duha ka bihag-sa-gubat, mideklara’g kaugalingong suspension of military offensives (SOMO) ang ComVal North Davao South Agusan Sub-Regional Command sa New People’s Army(NPA) sulod sa upat ka adlaw, gikan Pebrero 19 hantud 22, dinha sa lungsod sa Kapalong, San Isidro, Asuncion ug New Corella sa Davao del Norte ug sa Laak, Compostela Valley.
Kini aron mahatagan og lugway ang luwas ug hapsay nga pagrelis sa mga bihag-sa-gubat nga sila si Private First Class Jezreel Maata Culango (Serial No. 89158) sa 60th Infantry Battalion-AFP ug Police Officer 1 Ruel Pasion (Badge No. 194812).
Samtang anaa sa temporaryong hunong-buto sa mga nalatid nga erya, ang NPA magpabilin sa depensibang postura batok sa atake sa kaaway.
Kinahanglang tugbangan sa 10th ID-AFP ang maong SOMO ug ihunong niini ang pasistang mga operisyon ubos sa Oplan Bayanihan, kay kung dili, mosamot la’g kalangay ang pagrelis sa duha ka bihag-sa-gubat.
Isip makitawhanong aksyon, gi-arkibo usa sa NDF ang dokumentasyon kabahin sa pasiunang imbestigasyon batok sa duha ka bihag-sa-gubat kinsa nalambigit sa kontra-rebolusyonaryo ug kontra-katawhan nga mga operisyong militar sa 60th IB-AFP ug PNP dinha sa mga utlanan sa ComVal ug Agusan.
Nakita sa gitukod sa NDF nga grupong tig-imbestiga nga gaan lang ang nahimong mga salaod sa duha, ug busa girekomenda niini ang ilang relis. Apan, dili kini makapugong sa mga rebolusyonaryong pwersa nga arestohon sa umaabot nga panahon ang maong duha ka bihag-sa-gubat ugaling mapamatud-an nga nakahimo sila’g krimen batok sa katawhan ug ubang pagpangabuso sa tawhanong katungod.
20