ZAMBOANGA CITY – Burdado sa saksak ang katawan ng isang Muslim matapos itong tirahin ng isang security guard sa loob mismo ng comfort room ng Fantacy Disco Pub sa Zamboanga City.
Nabatid na ang biktimang si Ismael Sadaddin, 40, ay isa palang kagawad ng Barangay Pangasinan sa bayan ng Bongao sa Tawi-Tawi at umiinom sa naturang club kamakalawa ng madaling araw.
Ayon sa imbestigasyon ng pulisya, pinasok ni Bryan Yap, 28, ang comfort room sa club at inundayan ng saksak si Ismael habang umiihi ito. Anim na saksak ang tinamo ng biktima sa ibat-ibang bahagi ng katawan.
Tatakas pa sana umano si Yap, ng Jetski Security Agency, ng ito’y maharang ng mga parak sa labas ng club.
Sinabi naman ng security guard ng club na si Herry Eijansantos ay lumabas na umano si Yap at kinuha ang naka-depositong balisong, at ng malingat ito ay biglang pumasok muli si Yap at binira ang Muslim.
Inamin naman ni Yap ang ginawa at sinabi nito na masama ang tingin sa kanya ni Ismael kung kaya’t binalikan niya ito. Hindi naman mabatid kung bakit pumalya ang security guard ng club na i-report sa pulisya ang pagdadala ng balisong ni Yap sa kabila ng ito’y ipinagbabawal.
Nasa pagamutan pa rin ang biktima. Hindi naman mabatid kung bakit nasa club si Ismael gayun mahigpit na ipinagbabawal sa mga Muslim ang uminom ng alak at pumasok sa mga night club. Natapat pa ito sa Ramadan na kung saan ay dapat nasa ayuno o fasting ang mga Muslim. (Mindanao Examiner)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/
Share The News
20