MATI CITY (Mindanao Examiner / July 16, 2014) – Magparehistro sa Comission on Elections isip botante sakop sa Barangay Matiao, dinhi nga ciudad ang sobra 1,600 ka pamilyang nagtukod ug mga balay didto sa dumping area kaniadto sa Davao Timber nga gitawag na karon sa pangalan nga Lukatima Village.
Kini ang gikasabotan sa mao nga mga pamilya nga sakop sa kahugpongan nga Lumolopyong Kabus ug Timawa sa Matiao kon Lukatima. Giingon ni Leopoldo Dizon, presidente sa Lukatima, nga kung tinuod gayud nga manimuyo sa mao nga dapit ang mao nga mga pamilya, pwes, magparehistro sila sa Comelec.
Ang yuta nga gipangbalayan sa nahisgutang mga pamilya, usa ka dagat kaniadto nga inig hunas ginalabayan sa mga biya nga ginabas sa Daticor ug ubang basura unya gi-anaman og tabon sa graba sa mao nga kompaniya hangtod nga nauga ug wala na maabot sa dagat.
Gikasabotan usab sa mao nga tigum nga ang lote nga wala balaye ug ang mga nagpatindog sa mga haligi nga wala tiwasa kinahanglan kuhaon sa asosasyon aron ihatag niadtong kusonada kaayo nga magbalay. Gidili usab ang pagbalay unya paarkilahan lamang.
Ang matag lote ug mga dalan kinahanglang hinlo kanunay nga walay sagbot ug basura ug ang mga nagtapad nga mga lote kinahanglang mag-gahin ug agianan sa pinakagamay isa ka metros aron dunay maagi-an ang tawo ilabina sa panahon kung simbako adunay sunog.
Ang matag panimalay kinahanglang magtanom og kahoy prutas nga dili kaayo motaas aron mobugnaw ang mao nga dapit.
“Bawal gayud dinhi manimuyo ug bisan sa pagsulod sa mga badlongon, kriminal, tig-rayot, illegal nga druga, mariwana ug tanang kabuang ug ang matag panimalay kinahanglang adunay lata nga daku aron dokdokon kon adunay magbinuang, kawatan ug ubang matang sa krimin aron makabantay ang mga silingan ug mga Tanod,” matud pa ni Dizon.
Gipahibalo atol sa mao nga tigum nga ang matag kanto ug sa mga agi-an pasulod ug gawas sa Lukatima Village, adunay pondohanan sa mga tanod o purok police aron mabantayan ang mosulod ug pagawas sa mao nga lugar. Gipatuman usab karon sa Lukatima ang curfew hour.
Gikasabotan usab nga ang sa Purok sa Lukatima tiwason paghimo ug nagkasabot nga mag-amot ug tag-isa ka gatos ka pesos ang matag pamilya. Modawat usab ang asosasyon og donasyon sama sa zinc i-atop, kahoy, lansang, semento, tiles sa kasilyas, pintora ug uban pa.
Ang mao nga katawhan sa Lukatima Village nagkinahanglan og koneksyon sa tubig ilim-non ug linya sa kuryente.
“Bisag layo pa unta ang eleksyon, naa na unta mga politiko nga motabang aron maabot na dinhi ang linya sa tubig-mainom ug linya sa kuryente lakip na ang pag-greeder sa mga dalan sulod sa village,” matud pa sa isa ka membro sa Lukatima. (Sarx Lanos)
20