PAGADIAN CITY (Mindanao Examiner / Aug. 16, 2013) – Ugma Agusto 17, handumon sa Pagadian ang ika-27 na katuig sa nahitabong Linog ug Tsunami nga mikalas sa gatusan ka kinabuhi sa mga taga Pagadianon nga diin gitumbok nga pinaka unang hitabo sa kasaysayan sa tibook Asia kaniadtong tuig 1976.
Matud pa ni City Disaster Risk Reduction Management Council Head Haron Damada nga sa maong paghandum maoy unang higayon nga gihimo sukad nahitabo kaniadtong 1976 diin pagahimoon ang Earthquake and Tsunami drill lauman nga masaksihan ang reenactment sa mga nahitabo sa maong tuig.
Kini pagasalmutan sa mga coastal barangay, pinaaghi sa mga tulunghaan, government agencies lakip na ang mga nongovernmental organizations.
Permanente na usab nga ibutang ang command post sa dalang F.S Pajares, sa may poste dool sa Mercury Drugs ug ang usa marker nga maghinumdum sa tanan nga utlanan nga naabot sa maong tubig Tsunami nga nahitabo sa Pagadian kaniadtong panahuna.
Giawhag usab ni Damada ang mga katawhan nga makasaksi sa maong talagsaon nga kalihukan aron ila usab nga makat-unan ang mga impotanteng kasayuran may kalabutan sa mga pagpangandan kun emergency preparedness lakip na ang pamaagi sa mga pagrescue panahon sa susamang kalamidad.
Kagahapong adlawa malampuson ang gipahigayong usa ka adlaw nga Tsunami Orientation Seminar nga diin gitambungan sa mga coastal barangays, sa Dumagoc, Sta. Lucia, Santiago, San Pedro, Miricay ug Kawit ug mga tulunghaan niini lakip na ang mga nagkalain-laing Civil Society Organizations.
Kini ang gitambungan usab ni Pagadian City Mayor Romeo Pulmones, Vice Mayor Divina Grace Yu ug ubang mga sakop sa Sangguniang Panglungsod.
Ang maong seminar gidumala usab sa mga tinugyanan sa Office of Civil Defense sa pagpangulo ni Regional Director Adriano Fuego, tinugyanan sa Philippine Atmospheric, Geophysical and Astronomical Services Administration ug Philippine Institute of Volcanology and Seismology isip mga resource speakers atol sa maong seminar.
Lakip usab mihimo sa maong paghatag ug kasayuran ang mga tinugyanan sa Explosive Ordnance Disposal Team aron mahatagan sa tukmang kasayuran ang mga katawhan sa paglikay nga dili mabiktima sa mga nahitabong pagpamumba nga ginuhatan sa mga teroristang grupo.
Matud pa ni Fuego nga dako ang iyang kalipay nga gihatagan ug priority sa bag-ong administration city government sa Pagadian ang pagpatuman sa balaudnon sa pagbaton sa buhatan sa City Disaster Risk Reduction Management Council nga magtumbok sa pagdumala sa tanang matag sa kalamidad aron malikayan ang mga mabiktima niini. (Ely Dumaboc)
20