ZAMBOANGA CITY (Mindanao Examiner / Apr. 9, 2013) – Dalawang bangkay ang nabawi kahapon mula sa isang gusaling nasunog sa Zamboanga City matapos na umano’y makulong ang mga ito sa loob ng kanilang kuwarto.
Kinumpirma ni Zamboanga City Fire Marshall Dominador Zabala na nadiskubre nila ang bangkay matapos na magsagawa ng inpeksyon ang grupo nito sa ZamSulu Building sa Veteran’s Avenue.
“Confirmed at may dalawa tayong bankay na na-recover sa loob ng building pero hindi pa natin matiyak kung sino ang mga ito, ngunit may balitang mga helpers ang dalawang biktima,” ani Zabala.
Nabatid na mismong sa ikatlong palapag ng gusali nagmula ang apoy at isang 11-anyos na bata rin ang tumalon mula sa bintana at nasalo naman sa ibaba. Isang 65-anyos na matandang babae ay nasaktan rin matapos na maiipit ang daliri nito sa pagmamadaling makaiwas sa apoy.
Nakatakas naman ang mga ibang residente sa pamamagitan ng pagtatali ng mga kumot at saka bumaba mula sa mga palapag nito.
Pagaari umano ng Chua family ang naturang gusali sa Veteran’s Avenue, ngunit hindi naman nagbuigay ng anumang pahayag ang mga miyembro nito.
Ang nasabing gusali ay ginagamit rin bilang residential area at sa ground floor nito ay may banko, cargo forwarder, tailoring shop, tile store, gasul dealer, automotive parts store at dental clinic. Tinatayang aabutin sa mahigit P4 milyon ang pinsala sa sunog na nagtagal ng mahigit sa isang oras.
Isang masusing imbestigasyon ang sinimulan ng Bureau of Fire Protection upang mabatid ang dahilan ng sunog. (Mindanao Examiner. Alvin Lardizabal)
20