CEBU CITY – Mikabat sa 4,091 ka mga residente sa Barangay Sudlon 2 ning syudad ang natabangan sa libreng serbisyo sa kagamhanan sa dakbayan sa Sugbo pinaagi sa programa ni Cebu City Mayor Michael Rama nga gitawag nga ‘City Hall At Your Doorsteps’ kon ‘Piyesta sa Pagpangalagad’.
Sa pagsugod ning tuig 2015, ang naasoy nga barangay maoy unang giduaw sa kagamhanan ning dakbayan. Si Lola Cresencia Patubay, 62, ug adunay upat ka anak usa lamang sa mga nakabenepisyo sa mga libreng serbisyo nga nagpa-check-up sa iyang ubo ug sakit sa likod.
Gitataw niini nga: “Pasalamat gyod ug nalipay mi nga gibisita mi ninyo ug gihatagan ug libreng mga serbisyo kay layo man ning among barangay sa syudad ug daghan ang nanginahanglan sa mga serbisyo sa gobiyerno.”
Alang usab kang Fernando Villadegracia, 34, ang presidente sa Persons with Disabilities sa maong barangay, mipasabot kini nga maayo ni nga programa ni Rama kay alang man ni sa kaayohan sa katawhan ug angayan gyod ni ipadayon aron mas daghan pang matabangan matag barangay.
Dugang gipasabot ni Villagracia kinsa naglukat ug Cedula nga mas maayong himoon kaduha sa usa ka buwan ang kalihokan sa ilang barangay kay daghan ang nanginahanglan niini hilabina ang mga kabus.
Samtang mipadangat usab sa ilang hugot nga suporta ug presensya ang mga opisyales sa maong barangay nga gipangulohan ni Kapitan Winefredo Macario atol sa paghatag sa mga libreng serbisyo ngadto sa ilang mga konstituwente.
Gipaambit sa Kapitan nga dako iyang pasalamat ni Rama ug sa mga kawani sa dakbayan sa pagbisita sa ilang barangay. Gisasay usab niini nga dako na ug kalambuan sa ilang barangay sama sa katukoran sa ilang bag-ong sports complex, mga sakyanan ug kahimanan nga gihatag kanila ug nga wala sila pasagdi sa syudad.
Samtang naglangkob sa mga gitanyag nga serbisyo sa 22 ka departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.
Ang maong barangay nga adunay kapin sa 5,000 ka mga lumulopyo nga nagpuyo sa 16 ka mga sitio niini ikatulo na nga gibisita sa maong programa. Mokabat usab ug kapin sa usa ka oras ang pagbiyahe gikan sa Cebu City Hall paingon sa naasoyng barangay.
Dugang pa, ang kalihokan gipahigayon na matag adlawng Biyernes aron malukop ang 80 ka mga barangays nga naglangkob ning syudad kini diha sa paghatag ug serbisyo nga alang sa tanan. Gumikan usab sa mga kalihokan sa Sinulog karong tuiga ang sunod nga eskedyol ipahigayon ngadto sa Barangay San Roque karong Enero 30. (Greggy Jiggs Senados)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and https://mindanaoexaminer.com/
20