KAHIBULONGAN KINI si Sen. Leila De Lima. Bisan og nakulong siya sa mga kaso nga may kalambigitan sa droga makakuha gihapon siya og dakong atensyon gikan sa media. Ang ubang magbabalaod maglaway lamang intawon sa kaibog. Bisan gani si kanhi Presidente Gloria Macapagal Arroyo, nga ilegal nga gikulong, wa katilaw sa maong kaluho.
Wa siya tugoti nga makighinabi sa media human ang kanhi Justice Sec. De Lima ning-isyu og orden nga nagdili kaniya sa pagpatambal sa gawas sa nasud base sa huyang kaayong kaso sa pagpanlimbong sa eleksyon nga gisang-at batok kaniya sa mga malimbungong mga personahe sa administrasyong Aquino. Di pa gyud kontento niadto tungod kay si GMA pwedeng makapiyansa sa maong kaso, si kanhi DOJ Sec. De Lima ningpasaka kaniya og kaso nga pagpanglungkab o plunder, kaso nga di makapiyansa ang sinumbong, pagseguro nga padayon siya sa pagkatanggong sa prisohan tungod kuno sa iyang papel sa sayup daw nga paggamit sa pundo sa Philippine Charity Sweepstakes.
Ang duha ka kaso gibasura sa Korte Suprema. Ang Pinakataas nga Korte ningsita sa kanhi DOJ Secretary tungod kay wa mosubay sa Batakang Balaod ang iyang pagpugong sa masakiton nga Presidente nga magpatambal sa gawas sa nasud ug gidismis ang ikaduhang kaso kay way basihan.
Sa usa ka radikal nga pagbag-o sa kapalaran ug dikta sa karma si Senador De Lima ningpuli sa pwesto sa kanhi Presidente nga karon ningbalik na sa mata sa publiko ug sa media isip House Speaker. Ang iyang kalambigitan sa mga sindikato sa droga naghimo sa iyang kaso nga non-bailable o dili mapiyansahan. Sa taas nga panahon kauban niya sa sulod sa prisohan ang mga senador nga iyang gipasanginlan sa pagpanglungkab apan luoy sab tawon kay morag mas pintas ang gaba ug kapalaran nga iyang natagamtan kay mas taas na man ang panahon sa iyang pagkapriso kun itandi sa iyang mga kauban.
Dugang pa, duna siyay daghang magdadayeg sa han-ay sa media nga tataw kaayo nga tukoyon lang moduol dayon, momantala ug mosibya sa bisan unsay iyang gusto. Daghan sab siya og mga dumadapig sa mga parliyamento sa Uropa nga iyang gipasabot nga kuno ang iyang pagkakulong bunga sa pagpanghasi nga politikal ug way kalambigitan sa mga ilegal nga droga ug tungod sab kuno sa iyang kahuyang nga pagka babaye.
Di sama kang kanhi Presidente Arroyo, si Senador De Lima nagpahimulos sa kompleto ug wa pugngi nga kagawasan sa pagpahayag ug nagpabilin siya nga darling sa media. Bag-o pa lang gyud kaayo nga iyang gi-jab-ban si kanhi Special Assistant to the President, Bong Go. Nagsuspetsa siya kang Bong nga ningluwat na sa iyang katungdanan nga nagagamit og salapi sa gobyerno para sa mga tarpaulin ug mga billboard nga matud pa niya iyang makit-an sa tanang parte sa nasud. Nagtuo sab siya nga ang presensya ni Bong Go sa nagkalainlaing outlet sa media gipundohan sa gobyerno. Di makatarunganon ang maong pasangil tungod kay, sa pulong pa sa kanhi SAP, wa siyay gigamit “bisan usa ka sentimo” sa gobyerno sa iyang paghatag og hinabang ngadto sa mga kabus ug mga biktima sa katalagman lakip na niadtong nagkinahanglan og tabang pangmedikal. Pintok niyang gipahayag: “Daghan kog mga higala nga nagtuo sa akong pakigbisog ug gatabang nako nga mohatag og mga hinabang sa atong mga kababayan nga biktima sa sunog ug uban pang trahedya. Di ko pareha ni Sen. De Lima nga ninggamit og mga pundo gikan sa mga drug lords para sa iyang ambisyong politikal.”
Ang senador di katuo nga si Bong Go makahatag og dagkong hinabang ngadto sa mga naginahanglan nga di manguot sa panudlanan sa gobyerno. Mora na hinoon tawon siya og irong buang sa kasuko ug kalibog. Nakalimot siya, o ignorante lang gyud, nga sa Syudad sa Davao, ang pamaagi sa pagtabang pinaagi sa “Lingap Center” gitukod, gipalihok ug gisistematisa sa panahon ni kanhi Mayor Rodrigo Duterte. Ang Lingap nagatabang sa mga tawong nanginahanglan ug ang mga pundo ug mga suplay nga gikinahanglan nagagikan sa mga higala ug mga dumadapig sa Mayor. Usa ka klinika para sa mga bata nga may kanser ang gitukod sa Mayor. Ang nagdumala sa maong programa sa paghatag og hinabang sa katilingban mao si Bong Go.
Ang mga Malasakit Center nga ningtubo nga morag uhong sa tibuok nasud karong panahona personal nga ginadumala ni Bong. Lagmit dili katuo niini si Leila apan daghan ang mga maayong tawo nga nagasuporta sa proyekto tungod kay segurado sila nga ang ilang kontribusyon ihatag sa mga nanginahanglan. Wala na si Bong sa gobyerno apan padayon gihapon siya og implementar sa mga proyekto niya ug sa Presidente nga personal nga motabang sa mga sakop sa atong katilingban. Bahin sa mga billboard ug mga tarpaulin wa siyay mahimo niini. Kadaghan na siya ning-isyu og pamahayag nga kinahanglan tanggalon kini sa iyang mga dumadapig. Pipila ningsunod apan ang kadaghanan wa mosanong kay nasayod sila nga ang mga kandidato sa ubang partido nga nagkalainlain ang kolor sa politika mao sab ang ginahimo. Kana ang realidad.
Apan dili malaksi ang simpatiya ug suporta nga karon gitugyan sa masa ngadto kang Bong. Siya ang sinaligan niadto ug karon ni Presidente Duterte nga mohimo sa mga programa sa social action. Ma sulod o ma gawas si Bong sa Malacanang isip SAP ang Pangulo nagainsister gihapon nga si Bong anaa sa iyang kiliran. Si Bong ang kaban sa kasayuran sa Presidente ug nanumpa si Bong nga iyang alagaran ang Presidente sa tiunay ug way paglubad hangtud sa lubnganan.
Dili manegar nga si Bong ginganlan og photo bomber apan sa samang higayon nagpakita sab kana sa realidad nga siya naghupot og talagsaon nga oportunidad nga makatuon gikan sa iyang suod nga magtutudlo, ang kanhi Mayor ug karon Presidente na mismo, kun unsaon pagpadagan sa gobyerno, lokal o nasyonal, ug unsa ang serbisyo publiko ug unsaon kini pagpursige. Iya karon nga ginaimplementar ang iyang mga natun-an nga dili na siya SAP.
May leksyon dinhi para kang detinadong De Lima. Ang panultihon nagkanayon, “ayaw panlabay og bato sa imong mga silingan kun ang imong balay bildo”. Daghan usab siyag makat-onan sa klase sa serbisyo publiko nga ginahimo ni Bong. Mopalayo ni kaniya sa mga tentasyon nga maoy nagbalhog kaniya sa prisohan. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com
Mirror Site: https://mindanaoexaminernewspaper.blogspot.com
Digital Archives: https://issuu.com/mindanaoexaminernewspaper
See Media Rates: https://mindanaoexaminer.com/ad-rates
