KIDAPAWAN CITY (Mindanao Examiner / Feb. 17, 2012) – Patay ang 5 katao matapos na magsalpukan kahapon ang dalawang truck sa bayan ng Tupi sa lalawigan ng South Cotabato sa Mindanao.
Ayon sa pulisya ay head-on collision ang naganap sa isang Elf truck at isang fish carrier sa Barangay Polunoling bago mag-alas 6 ng umaga. Nabatid na kabilang sa mga nasawi ay ang driver umano ng fish carrier na nakilalang si Nestor Lambayan at ang ibang biktima ay pasahero naman ng kabilang truck.
Tatlong iba pa ang sugatan at posibleng ilipat ang mga ito sa lungsod ng Davao upang mabigyan ng karampatang lunas sa mga tinaming sugat sa katawan. Hindi pa mabatid kung gaano ka-grabe ang tinamong pinsala sa katawan ng mga sugatan.
Inaalam pa ng pulisya ang dahilan ng malagim na sakuna at kung nakatulog ba ang mga driver o nawalan ng preno ang kanilang mga truck.
Patungo sana sa lungsod ng General Santos ang fish car mula lungsod ng Tacurong upang mamili ng isda ng magkasalubong ang dalawang truck. Patungo naman sa lungsod ng Koronadal ang Elf truck, ayon pa sa ulat ng pulisya. (Midnanao Examiner)
20