CEBU – Giaghat ang Department of Public Works and Highways (DPWH) sa paghimo sa gimbuhaton nga gimandu sa balaod aron mapatuman na ang accessibility law alang sa mga may diperensya sa lawas.
Kini nga panawagan giluwatan ni Mateo Quilas, pangulo sa Bohol Federation of Disabled Persons Inc. naghangyo usab sa DPWH ilabi na sa Office of the Building Official sa pagseguro nga ang mga matukod nga mga gambalay pang komersyo, magasubay na sa balaod sa accessibility.
Ang Accessibility Law, o Batas Pambansa 344 nagamandu sa mas sayon nga paglihok sa mga tawo nga may kabilinggan, pinaagi sa pagpahimutang sa mga pasilidad ug mga gamit sa mga gitumbok nga mga buildings nga sudlan sa mmga may kabilinggan.
Tataw nga human sa linug, may mga buildings nga apektado ug nagkinahanglang ipahiuli. Sa laing bahin, duna usab mga building nga atukoron ning panahona, matud ni Quilas, kinsa nanguna sa pagduso sa katungod sa mga may kabilinggan.
Unta, aghat niya, nga estriktohon na nga ipatuman sa DPWH ang pagpahiluna sa mga rampa nga kaagi-an sa mga nagsakay sa wheel chair, o mga pansayan nga may espesyal nga probisyon sa mga may kabilinggan.
Kahinumduman nga pipila lang ka pangpubliko nga buildings sa Bohol ang duna nay rampa isip probisyon sa mga wheelchair, mga kabatan alang sa may kabilinggan ug mga confort rooms nga mahimo masulod ang wheel chair.
Gani, dili tanan nga shopping malls may igo nga probisyon alang niini, matud ni Quilas. Tungod niini, samtang nagbukas ang pagpang-hiuli sa mga buildings, unta, alang sa semana sa Disability Prevention and rehabilitation, bisan kani na lang una ang mapatuman, panahum ni Quilas.
20