KAUBAN ang nagkalain-laing pormasyon ug kahugpungan sa mga sector sa dakbayan sa Iligan, ang Ranao TriPeople Movement for Genuine Peace and Development (RTMGPD) mosalmot sa kalihukan sa tibuok nasud aron nga ipakita ang kalihukang paglingkawas gikan sa lapad nga kurapsyon, kalisod ug pagpahimulos karong petsa 12 sa Hunyo 2014 atol sa adlaw sa kagawasan gikan sa Espnaya nga tinuig nga kasaulugan sa nasud.
Sukwahi ang ilunsad nga kalihukan sa RTMGPD sa mga naandan nga alegreng selebrasyon kundi kalihukan kini isip pagpakita sa tinood nga kahimtang sa katawhan;
Pagsaway ug pagkondena sa padayong away sa mga opisyal sa Iligan City nga walay kalainan sa nasudnong plastada nga ga-sige lang ug sinabligay ug lapok ug walay klarong serbisyong gitunol ngadto sa katawhan ug ma sang pamulitika pa ang giuna;
Pagsalmot sa panawagan aron silutan ang tanang may kalambigitan sa PDAF ang DAP nga kontrobesiya o Kurapsyon sa bisan asang ang-ang ug ahensya sa kagamhanan o pagpaningil sa tulubagon sa kagamhanan ngadto sa katawhan;
Pag-abante sa baruganan nga kinahanglang himoong sentro ang katawhan ug ang kinaiyahan sa tanang programa sa kagamhanan sama sa serbisyo ug benepisyo sa mga mamumuo ug mga kabus ug pagbasura sa Philippine Mining Act, Electric Power Industry Reform Act (EPIRA), Contractualization sa panarbaho, ug pagsupak sa pagkaltas sa pundo sa mga batakang serbisyo, ug uban pa;
Dugang pa, KONDENAHON usab sa maong kalihukan ang walay hunong mga pagpamatay sa mga mamumuo sa pamahayag uban sa singgit sa hustisya alang sa tanang biktima;
Ubos sa Tema nga KAGAWASAN gikan sa Kurapsyon, Kalisod ug Pagpahimulos momartsa ang RMTGPD ug mga kaubanang organisasyon sa Iligan City gikan sa Iligan City Post Office palibot sa dakbayan ug mopahigayon dayon ug programa gikan sa alas 2.30 sa hapon Hunyo 12, 2014.
Giawhag nato ang tanang padayong nagpakabana alang sa tinud-anay nga kalingkawasan sa katawhan ug mga gipahimuslan nga mosalmot ug moapil.
Giawhag usab nato ang mga mamumuo sa pagpahayag nga mosaksi sa maong kalihukan ug isabwag ang tanang mensahe sa mga pakigbisog.
Ato usab nga isinggit ang Panaghiusa sa mga pinahimuslan ug mga kabus nga Moro, Lumad ug Pilipino taliwala sa mga hagit sa kasamtangang panahon.
Joel “Cyc” Cuabo
Information Officer
RTMGPD
June 10, 2014
20