CEBU (Cebu Examiner / May 28, 2014) – Gipahayag sa Private Hospitals Association of the Philippines o PHAPI nga ilhon na niini ang benepisyo sa mga miyembro sa Philippine Health Insurance Corporation o PhilHealth.
Matud pa ni PHAPI President Rustico Jimenez, kini human misaad ang PhilHealth nga mobayad na kini sa katapusan sa Hunyo.
Subling gipasabot sa asosasyon nga namugna ang una niining desisyon isip pagsiguro lamang nga aduna kini pondo nga pang-bayad alang sa ilang staff ug ubang bayronon sa ospital sama sa electric ug water bills.
Una nang gipasabot ni PhilHealth President Alexander Padilla nga ang kalangay sa pagbayad sa mga pribadong ospital tungod sa gipahigayong upgrade sa ilang sistema.
Kagahapon, nipasidaan ang PhilHealth sa mga pribadong ospital nga ihatag gayud sa matag pasyente ang mga benepisyong angay nilang madawat kay kun dili kini matuman, pahamtangan nila kini og silot .
Samtang ilusad na usab sa PhilHealth ang Case-based Payment System karong tuig alang sa mas paspas ug sihag nga pagbayad sa mga pribadong ospital. (MBCN, ECB)
20