CEBU (Cebu Examiner / May 28, 2014) – Karong nagkaduol na ang panahon sa ting-ulan, nipagawas og tips ang Department of Health aron mapugngan ang pagkatap sa sakit nga influenza o flu.
Gipasabot sa DOH nga ang influenza usa ka viral infection nga mo-atake sa respiratory system ug lain usab sa stomach flu virus nga mahimong makaingon sa pagkalibanga ug pagsuka.
Giingong daling taptan og influenza ang mga bata, tiguwang, mga buntis ug kadtong ubos ang immune system o resistensya.
Mahimong mapasa ang maong sakit pinaagi lamang sa pag-ubo. Makatakod usab kini pinaagi sa pagbaton og kontak sa mga butang ug sapot nga kontaminado sa mga discharge sa usa ka tawo nga infected sa influenza.
Apil sa mga sintomas niini mao ang hilanat nga mokabat sa 38 degrees Celsius, panakit sa ulo, runny nose, sore throat, ubo ug uban pang respiratory manifestations ug panakit sa muscle ug kasu-kasuan.
Mahimo kining tambalan pinaagi sa pag-inom og antiviral agents, sama sa oseltamivir o zanamivir, sa unang duha ka adlaw.
Makatabang kini aron mapadali ang panahon sa pagkasakit ug malikayan ang seryosong kumplikasyon. Mas maayo nga magbaton og igong pagpahulay, mo-inom og daghang tubig ug kaon og mga masustansyang pagkaon.
Alang sa hilanat, mahimong mo-inom og paracetamol apan giignong dili angay hatagan og aspirin ang mag bata. Giingong angay hatagan og antibiotics alang sa kumplikasyon lamang sa influenza, sama sa pneumonia o otitis media.
Mas makaayo kun magpabakuna batok sa influenza matag tuig ug molikay sa mga lugar nga daghang tawo. Gitambagan usab sa DOH ang publiko nga tabunan ang baba ug ilong kun mo-ubo aron dili mokatap ang dala nilang virus.
Giingong angay usab manghugas kanunay sa kamot gamit ang tubig ug sabon aron masiguro nga luwas sa sakit. (ECB)
20