ANG Pilipinas ug ang lalawigan sa British Columbia milagda og memorandum of understanding (MOU) nga nagtinguhang mapa-uswag ang pagkabutang sa mga Pilipino didto.
Si Presidente Benigno Aquino ug British Columbia Premier Christy Clark mi-saksi sa paglagda sa MOU Concerning Cooperation in Human Resource Deployment and Development.
Ang kooperasyon gilagdaan nilang Department of Labor and Employment Sec. Rosalinda Baldoz ug British Columbia Minister for International Trade Teresa Wat sa usa ka yanong seremonya nga gipahigayon sa Pan Pacific Hotel, Vancouver ning bag-o lang.
Ang maong kasabotan sa pamuo midason sa lig-ong panaghigala ug nagtubong relasyon tali sa Pilipinas ug lalawigan sa British Columbia.
Ang MOU nagtinguha sa pagpahisayon sa employment ug deployment sa mga mamumuong Pinoy sa British Columbia aron pagkab-ot sa panginahanglan sa pamuo nga paga-ilhon sa labor market information.
Ang kooperasyon nagtinguha usab sa pagpatuman sa kasamtangang patakaran aron ma-protektahan ang mga mamumuo ug pagdasig alang sa “sound, ethical, and equitable recruitment and employment practices.”
Ang maong MOU gipaabot nga magpalig-on sa kinuging pagtambayayong aron wagtangon ang mga babag sa certification, recognition ug matching of skills ug kwalipikasyon sa mga Pinoy agig pagsunod sa panginahanglan nga gitakda sa British Columbia regulations.
Pinaagi sa Philippine-Province of British Columbia MOU, matabangan ang mga Filipino workers nga nangandoy nga permanenteng maka-trabaho ug mamuyo didto. (Elvira C. Bongosia)
20
