NIPASIDAAN ang Philippine Health Insurance Corporation sa mga senior citizens nga magbinantayon batok sa mga fixers nga mangayo og bayad isip hulip sa pagtabang kanila sa pag-enrol sa PhilHealth.
Sukad gipatuman ang balaod niadtong Nobyembre 25, 2014, nagpanon na og adto ang mga senior citizens sa mga lokal nga buhatan sa PhilHealth offices aron mo-enrol sa programa nga wa damhang nakamugna og kahigayonan sa mga fixers sa pagpahimos sa ubang senior citizens nga nanginahanglan og tabang.
Matud pa ni PhilHealth President Alexander Padilla, libre ang enrollment sa maoang programa mao nga walay angay bayaran ang mga senior citizens.
“Do not deal with fixers. Enrollment in the program is free, wala po kayong dapat bayaran. Huwag ninyong hayaan na maging biktima kayo ng mga fixers” (Ayaw pakig-deal sa mga fixers. Libre ang enrollment sa maong programa, walay angay bayaran. Ayaw togoti nga mahimo kamong biktima sa mga fixers), pahimangno pa ni Padilla.
Matud pa nga walay angay dalian sa pag-enrol tungod kay makapahimolos man sa benepisyo sa PhilHealth kun kinahanglan na nila kini, ma naa man o wala’y PhilHealth ID. Kinahanglan lamang nilang ipakita ilang senior citizen card tungod kay nakig-koordinar na ang PhilHealth sa ilang mga accredited health care providers kalabot niini.
Ang PhilHealth nipagawas sa Circular 33, series of 2014 nga nag-awhag sa mga senior citizens sa pag-enrol sa PhilHealth sa pakig-koordinar sa ilang nagkadaiyang Office of Senior Citizens Affairs o pinaagi sa buhatan nga gitugotan sa lokal nga kagamhanan, sa lokalidad diin sila nagpuyo.
Gitahasan usab niini ang Department of Social Welfare and Development, senior citizen organizations nga rehistrado sa angay nga nasudnong ahensiya, bisan unsang non-government organization o bisan unsang non-profit private organizations sa pagsiguro sa coverage sa PhilHealth sa mga senior citizens. (Elvira C. Bongosia)
20
