PAGADIAN CITY (Mindanao Examiner / Apr. 22, 2014) – Gibutyag ni City Councilor Ernesto Mondarte ang pag-reactivate sa Pagadian City Anti-Drug Abuse Council ni Mayor Romeo Pulmones.
Sa Pakisayod sa Alindahaw, iyang giingon nga gi-convene nila ang mga sakop sa maong kunseho ning bag-o pa lang ug aduna silay importanting gipanghisgutan ang kabahin sa mga plano ug programa, lakip niini ang pag-organisar sa Barangay Anti-Abuse Council.
Samtang kabahin sa pagkig-away batok sa illegal nga droga, giingon pa niya nga iyang napasar ang usa ka proposed ordinance sa Sangguniang Panlungsod alang sa pagmugna ug pag-establisar sa usa ka administrative board.
Kini mao ang modeklarar nga usa ka nuisance place sa mga public establishment nga gigamit niining mamaligyaay og shabu sa ilang negosyo ug may gihimo nga usa ka drug den.
Tingali niining puntoha, gipuno pa sa kunsehal nga makatabang pod ang mga tag-iya sa mga establishment nga mag-police pod sa ilang mga area aron walay illegal drug activities sa sulod mismo sa ilang mga establishment kay kun naa ug mapamatud-an ang administrative board na maoy mo-deklarar isip isip nuisance place ug maka-rekomendar kini alang sa pagpasera o revocation of permit to ope-rate niini.
Gipasabot pa kunsehal nga kini ilang gihimo tungod kay walay presensiya dinhi sa Dangerous Drug Board isip usa ka policy making body ug wala kiniy personal nga pag-monitor sa problema sa droga dinhi sa siyudad sa Pagadian.
Busa matod pa niya, kining anti-drug abuse council maoy mohulip sa sa Dangerous Drugs Board kay mahimo man kining usa ka policy making body base sa drug statistics ug activities dinhi.
Mao usab kini ang mogunit ug mosuperbisar sa demand reduction ug educational campaign ngadto sa atong mga eskwelahan ug labaw sa tanan sa mga ginikanan.
Mokuha usab kini og mga data nga maoy basihan sa mga policy nga ipakanaug sa kunseho.
Ang nahilakip sa kunseho gidugtong pa ni Mondate mao ang atong mayor ug bise-mayor, ang chief of police, tinugyanan gikan sa Department of Education, religious group, ug giila nilang force multiplier nga anti-drugs organization.
Gibutyag ni Zamboanga del Sur provincial director Supt. Sofronio Ecaldre ang ilang nasinati nga mga problema niining nagpayuhot sa gidiling droga dinhi sa siyudad ug lalawigan.
Kini kay ning miaging semana naay nadakpan ang taga-Pegsot sa Camp
Abelon apan naay gamay nga problema sa fiscalia, apan ila na kining napangitaan og sulbad.
Apan bisan niini dinhi sa lalawigan nagtaas ang mga kalampusan batok sa mga tigpayuhot sa mga gidilingdroga ug significant kaayo ang pagtaas sa ilang accomplishment.
Pero iyang giangkon nga na-discourage siya kay bisan kaayo agresibo kaayo ang Pegsot sa ilang trabaho nagkadaghan man hinoon ang mga droga dinhi.
Seguro kini tungod kay nasudlan man ang nasod sa Mexican drug syndicate ug mao tingali kini ang hinungdan kun nganong nagtaas ang supply ug mikunhod ang presyo sa droga.
Busa iyang giingon nga angay gayod nga mag-double time ang pulis ug ang PDEA, ang ilang Pegsot nga gipamunuan ni Mondarte nga gisuportahan sa ilang mga police personnel.
Gidugang pa ni Ecaldre ang gisuportahan sa provincial government ang Pegsot kay ang operation kontra sa gidiling droga kinahanglanon man gyod ang kuwarta niini.
Mao kini ang hinungdan nga kun aduna man silay accomplishment batok sa gidiling droga tungod sa suporta sa provincial government ug ni Mondarte.
Gidugtong pa usab ni Mondarte nga mao kini ang nakahatag og peligro dinhi sa atong lugar kun ang hisgutan ang kalabot sa gidiling droga, busa gikinahanglan gayod nga mahimo kitang tanan mabinantayon ug ma-edukar ang mga ginikanan.
Kini matod pa niya, kining atong lugar mao ang nahimong sentro sa operasyon, ug ang kilid-kilid ilang na-obserbahan basi usab sa taho sa Philippine Drug Enforcement Agency ug Philippine National Police mao ang nahimong distribution area.
Kini sama sa Zamboanga Sibugay, Misamis Occidental ug Lanao provinces.
Giingon pa niya nga nalipay siya nga wala na karoy narco-politician nga nagingkod dinhi pero kining mga ginagmay moabot gihapon dinhi kay ania kita sa kinatung-an niining mga giilang lugar.
Kini matod pa niya dili ikalimod kay adunay gihimong operation diha dapit sa Lanao ug nakuha ang 300 ka mga sachet ug 11 ka mga high-powered fire arms ang nakuha.
Dinhi usab sa kasadpang bahin, ang Malangas ang nadungog nga maoy ganghaan sa gidiling droga nga mikuyanap karon sa probinsiya. Busa sa kanunay iyang giawhag ang katawhan nga magpakabana ilabi na ang mga ginikanan.
20