DAVAO DEL NORTE (Mindanao Examiner / Apr. 6, 2014) – Hapit 40 ka pamilya nga sakop sa Purok 6 sa Barangay New Bohol, dinhi nga lunsod sa New Corella, ang nag-antos hangtod karon sa pagkuhag tubig-mainom gikan sa halayo nga tinubdan.
Si Barangay Kagawad Victor Legurpa nagbutyag nga gawas sa tubig-mainom nga ilang gikinahanglan, nangandoy usab sila nga matukoran ug bularanan nga semento (dryer) ug bodega.
Kahibaloan nga ang Purok 6 mao ang umahan sa humay apan bahaanan abot ang tubig ngadto sa kuwarto sa kabalayan.
“Gusto namo nga human sa pag-ani sa humay mauga dayon ug mapondo sa bodega nga habog aron dili mabasa ang mga humay kay bisag sa gamay lang nga ulan mo-baha na ang among lugar ug hinaut nga matabangan kami sa mga opisyales sa kagamhanan,” dugang pa ni Legurpa.
Ang residente sa Purok 6 nagkinahanglan ug bisag tulo lamang ka rolyo sa hose nga numero tres aron masubayan sa tubig mainom ngadto sa ilang panimalay.
Sa wala pa gipahigayon ang ulahing eleksyon sa barangay, ang Purok 6 gi-abot pa sa supply sa tuig-mainom agi ang hose sa pribadong yuta, apan human sa piniliay, ang hose giputol sa tag-iya sa yuta nga na-agi-an sa hose kay napilde sa eleksyon sa barangay ang mao nga tag-iya. (Sarx Lanos)
20