CAGAYAN DE ORO CITY – Tatlong katao ang inulat na nasawi dahil sa Bagyong Seniang na humagupit sa Mindanao.
Ayon sa mga awtoridad, nalunod ang isang matandang lalaki matapos itong anurin sa Naboc River sa bayan ng Monkayo sa Compostela Valley. Tumatawid umano ang matanda ng ito’y tangayin ng malakas na agos ng ilog.
Nalunod rin ang isa pang lalaki sa Agusan River ng ito’y madulas habang pilit na kinukuha ang mga inanod na niyog sa baybayin.
At mahigit sa isang dosenang katao rin ang nasaktan ng sumadsad ang bus na kanilang sinasakyan sa Tagum City na kung saan ay isang pasahero ang sinasabing nasawi ng ito’y maipit sa kanyang upuan.
Madulas umano ang kalsada dahil sa lakas ng ulan kung kaya’t nawalan ng kontrol ang tsuper ng bus at sumadsad ito sa isang dike. Hindi pa mailabas ng Office of the Civil Defense sa Mindanao ang tumpak na bilang ng mga typhoon-related casualties dahil abala ang lahat sa pag-asikaso sa mga biktima ng bagyo.
Patuloy pa rin na binabantayan ng pamahalaan ang mga lalawigan sa Mindanao ngunit hirap pa rin makuha ang tumpak na bilang ng mga nasalanta ng baha, bagama’t libo-libong pamilya ang tinatayang apektado.
Ayon sa National Disaster Risk Reduction and Management Council, kabilang sa mga apektado ng bagyo, bukod sa Compostela Valley at Tagum ay ang mga sumusunod na lalawigan – Surigao del Norte at Sur, Siargao, Agusan del Norte at Sur, Misamis Oriental, Camiguin, Davao Oriental, Davao del Norte, Bukidnon, Lanao del Norte at Sur, Misamis Occidental, Zamboanga Peninsula, at Dinagat province.
Inaasahan na hahagupitin rin ng bagyo ang Visayas dahil doon nakatuon ang direksyon nito.
Kamakalawa ay nabalam rin ang Tagbilaran Airport matapos na ma-flat ang gulong ng AirAsia Zest airbus sa runway. Kahapon ay nai-alias na ang nakahambalang na eroplano, ayon sa Civil Aviation Authority of the Philippines.
Nakahanda na rin ang Cebu provincial government sa pagdating ng bagyo at inilagay na sa blue status ang buong lalawigan at nasa storm signal number 1 na ito.
Maging ang mga rescue team at sundalo at pulisya ay naka-antabay na rin sa pagdating ng bagyo at kinansela na rin kahapon ang lahat ng aktibidad kaugnay sa Rizal Day celebration ngayon Disyembre 30. Marami na rin ang stranded sa mga pier at paliparan dahil suspendido na ang biyahe ng mga barko at eroplano. (Mindanao Examiner)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and http://www.mindanaoexaminer.net/
20