NAKALINGKAWAS NA SI Sec. Jesus Dureza gikan sa di makiangayon ug mangitngit nga burukrasya. Siya unta ang mobugha sa duha ka dagkong opisyales nga ander niya nga nag-asikaso sa mga proyekto sa PAMANA sa Office of the Presidential Assistant for the Peace Process. Iya pang gibiripikar ang mga kasayuran ug ebidensya nga nahipos batok sa duha ka opisyales nga si Usec Ronal Flores ug Asst. Sec. Yesther Donn Baccay. Gipahibalo na niya si Pres. Rodrigo Duterte bahin niini. Malas lang kay kinahanglan ni Secretary Dureza nga mobyahe sa New York aron morepresentar sa nasud sa usa ka punsyon sa United Nations. Halos wa pa siya makapanghabwa sa iyang maleta pag-uli niya dihang gianunsyo ni Presidente Duterte ang pagpalagpot sa maong mga opisyales.
Nahulog sa alang-alang si Secretary Jess tungod niini ug gihimo niya ang tama nga lakang pinaagi sa pagsumiter sa iyang pagluwat sa iyang posisyon ngadto sa Presidente, ug sa susamang lakang nga gihimo ni Duterte sa pag-anunsyo sa paggirawot sa duha ka opisyales, iya sab nga gipatik ang iyang sulat sa pagluwat sa Facebook ug gihatagan og kaugdangon sa maong sulat ang pag-ako niya sa pangkinatibuk-ang responsibilidad sa kurapsyon sa OPAPP.
Sa pagdawat sa resignation ni Dureza, dili lang si Duterte kundili ang tibuok nasud ang nawad-an og suod nga magtatambag ug asset, Dili maihap ang mga higayon nga gibutang ni Jess ang iyang kinabuhi sa kakuyaw aron sa pagpakignegosasyon ug pagsalbar sa mga biktima sa kidnapping, mga biktima nga gigamit og taming sa way kalooy nga mga criminal, pagkumbinsi sa mga Ampatuan nga mosurender ug moatubang sa korte tungod sa ngilngig nga pagpatay sa mga peryodista ug mga paryente sa iyang kaatbang sa politika. Si Beth ang asawa ni Jess anaa sa kahimtang nga delikado ang panglawas, ug kadaghan na nahitabo nga mientras naospital ug giatiman sa intensive care unit, magdalidali si Jess ug byahe aron himoon ang tahas nga way laing mohimo. Pagmata niya, mag-ampo una siya sa kahilwasan ni Jess ug dayon ang iyang pagpasalamat sa Diyos para sa iyang kaugalingon nga gitagaan pa siya og dugang lugway sa kinabuhi.
Kun may kalinaw ug kahusay ang Mindanao karon, ihatag nako ang tanang kredito ngadto kang Secretary Dureza tungod sa iyahang way hunong nga pagpaningkamot ug pagkumbinsi sa mga lideres sa MILF ug MNLF nga molingkod sa lamesang pangnegosasyon. Di mahutdan og pasensya si Jess inubanan sa lahutay ug makadani ug katuhoan nga sinultihan.
Ug kapila sab siya mobyahe og Netherlands aron makignegosasyon kang Jose Ma. Sison, ang nangulo sa New People’s Army? Kapila siya mopanaw og libo ka libo ka milya aron dili maputol ang pagpakighinabi nga opisyal apan dili dayag o back-channel talks aron kumbinsihon kining hawod sa sinultihang doble og kahulogan nga mobalik sa lamesang pangnegosasyon? Kun nagtuo mo nga ang winter sa Oslo ug Hague makapahinam ug ang pagsakay og ayroplano sa economy class nindot ug makalingaw, purbahi ninyo og himo ni og bale dose ka beses aron ninyo madiskubre ang kahulogan sa tensyon ug grabeng kakapoy. Apan si Jess Dureza dili mosurender dayon sama sa kasagarang tawo.
Kun ang iyang duha ka assistant nanguot sa panudlanan ug kinahanglang igirawot, igo ba kini nga rason nga buhian sab si Sec. Jesus Dureza? Mr. President, gitugyan nimo ang daghang trabaho kaniya. Kun ang kaduhaduhaan nga proseso sa pagpili sa 3rd Telco wa nimo nabantayi ug ang mga ningdibuho ug ningmaneho niini nanagsadya nga mora og sila ang tag-iya sa umaabot, nganong di nimo pwedeng paminawon si Jess? Nagkasinabot man mong duha nga palagputon ang mga kurap, ug nganong mosangput man kini sa pagluwat ni Jess sa delikado ug komplikado nga arte sa negosasyon para sa kalinaw ug kahusay ug pagtugyan nimo niini ngadto sa … lain na sab nga tawong gikan sa han-ay sa militar?
Buyno basin kun ang pagkulukabildo bahin sa kalinaw dili gyud magmabungahon, ug ang sunod nga opsiyon mao ang kombating todo-todo. Lanog ug dayag nga gibandilyo kini nga mensahe sa Presidente, mopadala og mga tropa ug mga helicopter nga panggyera sa mga lugar nga gigubot sa mga terorista. Basin og panahon na nga ang tawo nga nagapursige sa kalinaw mopadaplin. Ug samtang atong gihimayhimay kining isyuha, anaay usa ka linalang nga hilom nga naghambin sa iyang tumang kalipay sa kasamtangang panghitabo ug katikaran. Si Beth, mapailobon, pasensyosa, ang buhing martir sa dugay na nga pagpangita, pagsubay ug pagpursige ni Secretary Dureza sa makuyaw nga dalan padulong sa kalinaw ug kahusay. (Jun Ledesma)
20
