OPINYON: Banggiitang Professor sa UP mosuporta kang Bong Go ni Jun Ledesma

DI SILA kaila apan nakadungog na sa usa’g usa. Wa gani ni sila magkita pero nakahibalo ang kada usa kun unsay ilang mga gimbuhaton sa ilang tagsa tagsa ka trabaho. Si Bong Go, ang pinakasinaligan ni Pres. Rodrigo Duterte sa paghimo sa mga gimbuhaton nga ginatawag og programa sa corporate social responsibility sa Buhatan sa Ehekutibo, ningkumpisal nga di siya kaharong kang UP Prof. Clarita “Claire” Carlos tungod sa pagkahalangdon sa iyang posisyon sa natad sa edukasyon. Sa iya sab nga kabahin, bilib sab kaayo si Professor Carlos sa gipanghimo ug sa agi sa kanhi Special Assistant to the President isip konpidante ug magtatambag sa Presidente ug tig-implementar sa programa sa social outreach sa iyang boss.

Dili kinaiya ni Bong Go ang pagbutang sa iyang pangalan sa mga sudlanan sa mga hinabang ngadto sa mga nanginahanglan. Di gani ni siya mangutana og asa ka nga kampo sa politika. Way bale kaniya og pro-Aquino ka ba o Romualdez ba sa paghatag og mga hinabang sa mga biktima sa bagyo o sunog o pasyente nga nagkinahanglan og medical assistance. (Na-getz ninyo?)

Nakadungog na si Professor Carlos sa programa sa Malasakit Center ni Presidente Duterte. Sa wa pa siya moluwat pagka SAP human niya og file sa kandidatura pagka Senador, nakatukod na si Bong og pipila ka Malasakit Center sa nagkalainlaing bahin sa nasud. Pwedeng mabaylobaylo ang pangalan sa Malasakit Center ug iyang pangalan. Pareha ra ni sa Lingap Center nga nagatabang sa mga pobreng pasyente sa Davao City. Si Bong Go ang in-charge sa programa sa panahon nga siya pa ang executive assistant ni Mayor Duterte. Mao ni ang rason nga sinati na kaayo niya ang tumong ug mga kalihokan sa maong mga center.

Pero wa tuyoa nga magsugat gyud ang mga dalan sa UP Professor ug sa SAP kanhi. Ang drayber ni Carlos giataki sa kasingkasing ug kinahanglan nga dalhon og dinalian sa ospital. Tungod kay retiradong sundalo, gidala siya sa Veterans Hospital nga ninglabas nga kulang og mga kahimanan pag-atiman sa pasyente nga naistrok. Ang sunod nga opsiyon mao ang Philippine Heart Center kun diin siya giadmiter ug gitambalan. Nagpatongpatong na ang mga balayranan ug ang tinigum sa pobreng drayber ug ni Claire nahurothurot na gyud. Sa panahon nga pagawason na ang pasyente ug gipakwenta na ang mga balayronon sa ospital, gisultian sila nga nabayran na tanan.

Mao ni ang gipatik ni Prof. Carlos sa akong FB: “Serafin Ledesma Jr, salamat sa imong gisulat bahin sa akong kritisismo sa ospital para sa atong mga retirado nga military. Bahin sa bag-ong katikaran sa pasyente: nagabalik na ang iyang kabaskog ug paspas sab, ilawom sa tambal nga laser ug acupuncture! Human sa 1 1/2 ka bulan, makalakawlakaw na siya og hinay ug di na siya nguhal! Dako gyud nga kausaban sa tinuod lang!

Ang nakaparat kay human sa amot-amot para sa iyang dakong balayranan sa ospital, duna pay nabilin nga dakong kantidad nga utang sa Philippine Heart Center.

Pinaagi sa usa ka estudyante nako niadto, gipahibalo nako ang kanhi SAP, nga wa kaila nako, ug wa magdugay, gibayran niya ang nabilin nga utang!

Wow! Agig balos, akong gitanyag ang akong serbisyo sa consultancy ngadto kaniya, way bayad, bahin sa nasudnong depensa ug tulomanon sa internasyonal. Wa siya motubag… Pagka manggiluy-on nga tawo! Salamat!” Katapusan sa mensahe.

Sama kang Bong wa pa mi magkita ni professor pero higala mi sa Facebook. Ginabasa nako ang tanan niyang ginapatik tungod kay ang iyang maalamon nga diskusyon sa nagkalainlaing tema ilawom sa langit pwerte ka bililhon nga way sama. Giasoy nako ang usa ka adbokasiya ni Bong Go bahin sa kabatan-onan ug mao ni ang iyang komentaryo:

“Serafin Ledesma Jr, usa ni ka dalayegong plano para sa atong kabatan-onan!

Naglaum ko nga si kanhi SAP Go makahunahuna sab og tabang og pundar og mga pampublikong library nga dunay mga pasilidades para sa tanang tawo bisag unsay edad apil ang mga tigulang sama nako nga hapit na mokabat og 10% sa atong pangkinatibuk-ang populasyon.

Ang atong kabatan-onan dili angay nga magsige lang og suroysuroy sa mall! Kini nga pampubliko nga mga library pwedeng gamiton sab nga mga sentro sa mga komunidad kun diin ang kabatan-onan tun-an ug bansayon sa pagpakunhod sa mga epekto sa katalagman ug pagpahaom human niini, apil na ang pagtudlo ug pagbansay kanila sa tanang aspeto sa pagdumala o liderato!

Mabuhay ka, kanhi SAP Go! Ako naglaum nga di madugay mahimo kang usa sa mga decision maker sa atong nasud aron mas mopaspas ang katikaran! Saludo!’’

Bitaw, naay pipila ka kandidato nga swerte kun di man gipanalanginan. Apan di lang ni bendisyon kay dako kaayo ni og epekto tungod kay ang suporta gikan sa usa ka inila ug respetadong professor di lang sa University of the Philippines kundili sa han-ay sa mga manggialamon sa akademya.

Dako ni nga pwersa nga moduso sa kandidatura ni Bong Go wa pa gani magsugod ang kampanya ug hangtud sa adlaw sa piniliay.
 (Jun Ledesma)