ANG MGA senador nga supak sa paglugway sa balaod militar sa Mindanao angay nga mamalandong sa ilang “mahayag nga mga opinyon” nga yano ra kaayong nagdeklarar nga way basihan bisan gamay ang katarongan sa kasamtangang administrasyon sa pagpadayon sa pag-imposar sa martial law sa rehiyon.
Halos wa pa gani mahanaw ang alingawngaw sa mga diskurso sa mga magbabalaod sa han-ay sa oposisyon, gimandoan sa Partido Komunista sa Pilipinas ang iyang mga armadong partisano, ang New People’s Army, sa paglunsad og bag-ong opensiba batok sa mga pwersa sa gobyerno. Gipan-an sa utokan nga Pres. Rodrigo Duterte ang CPP/NPA pinaagi sa iyang hangyo sa paglugway sa martial law ug nanggula dayon kini sa ilang mga tagoanan nga nagsinggit sa ilang determinasyon sa pagpursige sa ilang paninguha nga lumpagon ang gobyerno. Pasko pa ra ba gyud.
Kun ang mga Senador sama kang Kiko Pangilinan, Frank Drilon, Chiz Escudero, Riza Hontiveros, Bum Aquino ug Ralph Recto wa magkonsiderar niini nga rebelyon o armadong pag-alsa, wa ko kahibalo og unsa na ni. Sayo niining bulana, ang legal nga mga frenteng politikal sa mga komunista nasakpan nga nagdala og panon sa mga bata nga lumad sa Talaingod, Davao del Norte aron sila madoktrinahan. Si Ka Satur Ocampo didto sa maong kabukiran ug iyang giinsister nga ang iyang tuyo mao ang pagsalbar sa mga batan-ong lumad gikan sa mga hulga sa militar. Sa dihang ang mga bata luwas na didto sa mga kamot sa mga personahe sa Department of Social Welfare and Development ug sa mga pwersa sa gobyerno, ilang giasoy ang makalilisang nga mga sugilanon nga nagbutyag nga ang armadong pag-alsa nagapadayon pa gihapon sa Mindanao. Ang mga bata gitun-an og unsaon paggamit sa mga pusil – gikan sa pagpabuto ngadto sa pagdismantle og nagkalainlaing armas de fuego. Ang mga komunistang party list nag-implementar og bag-ong curriculum sa mga eskwelahan sa Salugpungan ug kining mga senador nga nahinganlan wa gyud magpakabana sa maong makaalarmang katikaran.
Hinoon tama si Kiko sa iyang pamahayag nga ang isyu sa martial law ekstensyon sa Mindanao may implikasyon sa umaabot nga piniliay nga naatol sa tunga-tunga sa termino sa kasamtangang administrasyon. Iya na nga naanalisa nga halos tanang gobernador ug mayor pabor sa paglugway sa martial law. Kining mga lideres sa Mindanao segurado nga wa malipay sa posisyon sa mga senador nga supak sa ilang gipangayo nga ekstensyon sa military control nga para kanila dako kaayo og kahulogan sa pagwagtang sa kaguliyang ug pagkab-ot sa kalinaw sa rehiyon.
Ang kapungot sa Mindanao ang ilang maani. Wa ko magtuo nga si Kiko, Drilon, Escudero, Aquino, Hontiveros ug Recto pasayloon sa ilang pagsupak sa sentimiyento sa katawhan sa Mindanao. Problema niining mga magbabalaora kay makaanhi lang og Mindanao sa panahon lang sa eleksyon. Di nila mabati ang pulso sa katawhan ug di nila makita ang mga hulga nga giatubang sa rehiyon. Dili ni naghingapin nga pamahayag. (Jun Ledesma)
20
