DIPOLOG CITY (Mindanao Examiner / Mar. 13, 2013) – Malampusong gidakop ug gipasakaan sa kasong “theft” sa mga sakop sa City Environment and Natural Resources ang magti-ayon nga gi-alegar nga mipalit sa kahoy’ng Antipolo nga residente sa barangay Dicayas Relocation Site ning dakbayan sa Dipolog sa milabayng semana ning tuiga.
Nasayran ning buhatan sa impormasyon nga gipasakaan na ug kaso ni OIC-City ENRO Edwin Bation sila si Rosalinda Adrias, 58, ang panuigon ug Cecilio Adrias, 60, ang panuigon gumikan sa pagpalit nila sa kahoy nga gipanag-iyahan sa usa ka Ermie Ogoc nga residente sa barangay Larayan sa dakbayan sa Dapitan.
Matud pa ni Bation nga mikabat sa 70 ka mga pididos sa nasangpit nga kahoy ang nadakpan ubos sa hini-usang operasyon sa Department of Environment and Natural Resources (DENR) ug sa buhatan sa City ENRO diin human sa gihimong operasyon nianang buntag sa Huwebes Marso 7 ug sa pagkahapon usab naningkamot ang magti-ayong Adrias nga masulod sa ilang balay ang mga kahoy busa sila ang gipasakaan sa kasong theft ug kasamtangan karong gibalhog sa Dipolog City Jail.
Nagkanayon si Bation nga ang magti-ayong Adrias ang nakalapas sa Presidential Decree No. 705 nga mao ang “Revised Forestry Code of the Philippines”.
Sa interview usab ngadto ni Rosalinda Adrias didto sa sulod sa selda, matud pa niini nga silang magti-ayon ang wala’y kalibutan nga sila di-ay ang nakalapas na sa bala-od kabahin sa kahoy nga ilang gipalit gumikan kay sila ang inosente kaayo may kalabot sa pamala-od sa mga kahoy.
20