Ang larawan mula sa Wikipedia ng carcass ng isang patay na sperm whale. (Dirk Claesen shot at Scheveningen beach in The Netherlands).
ZAMBOANGA CITY (Mindanao Examiner / Sept. 19, 2012) – Isang sperm whale ang natagpuang patay sa karagatan ng Basilan province kahapon at agad itong dinala sa Zamboanga City ng mga kawani ng Bureau of Fisheries at ng Philippine Coast Guard upang suriin.
Sinabi ni Coast Guard Lt. Ludovico Librilla na ang balyena ay natagpuan halos 1.5 milya lamang ang layo mula sa baybayin. Itinimbre umano ng mga mangingisda sa mga awtoridad ang pagkakadiskubre sa balyena.
Ayon naman kay Lt. Commandet Eliezer Dalnay, ang hepe ng Coast Guard sa Zamboanga City, ay umabot sa 22 metro ang haba ng balyena, ngunit hindi pa mabatid kung ano ang ikinamatay nito at kung ilan araw na itong nakalutang sa dagat.
Ngunit naunang tumanggap ng ulat ang Coast Guard na may nabangga na malaking “isda” ang isang maliit na barko sa naturang lugar nuong nakaraang Biyernes, subali’t hindi pa matiyak kung ito ay balyena o hindi.
Ang sperm whale (Physeter macrocephalus) ay isang mammal at hindi uri ng isda. (Ely Dumaboc)
20