ZAMBOANGA SIBUGAY (Mindanao Examiner / Feb. 1, 2012) – Padayon karon sa pag-awhag ang lokal nga kagamhanan sa musipyo sa Tungawan sa Zamboanga Sibugay sa iyang mga katawhan, ilabi na ang mga lumulopyo sa mga kadagatan nga mabantayang hingpit ang maong mga lugar nga giilang Best Marine Protected Area sa atong nasod.
Ang Bangaan Marine Sanctuary sa Barrio Tigbucay sa Tungawan ang usa lamang sa 150 Finalist nga misalmot sa gipahigayong 2011 Marine Protected Awards niadtong lamang niaging tuig sa Bahay ng Alumni,University of the Philippines sa Diliman, Quezon City.
Matud pa kay Jocelyn Luna Information Officer sa Munisipyo sa Tungawan, nga ang nakab-ot nilang “1st Placer” sa tuig 2011 sa gipahigayong “Para el Mar” nga gipangunahan sa mga katawhan sa Marine Science sa Pilipinas, ang bunga sa ilang malampusong pagpatuman sa kinaiyahan sa ilang mga nasakupang lungsod sa pagpanguna ni Tungawan Mayor Randy Climaco.
Ang baybayong lugar sa Tungawan nga giila karong “Best marine Protected Area sa Pilipinas” nga anaay 880 ektarya nga nakahatag ug dakong panginabuhian sa mga sibugaynon.
Tinguha pa ni Mayor Randy Climaco ang pahugpong sa mga katawhan sa iyang Munisipyo sa pagduyog sa pagluwas ug pag-amoma sa kinaiyahan para magapabilin ang kalunhaw sa kadagatan nga gisakop dili lamang sa Tungawan, kundili sa tibuok Probinsiya sa Zamboanga Sibugay.
“Nagpasalamat ako sa tanang mga ginsakpan niining maong munisipyo nga nagkugi sa tanang paagi para padayong ma-preserba ang lugar nga atong ginakuhaan ug panginabuhian” matud pa ni Climaco sa Mindanao Examiner.
Gidayeg usab ni Zamboanga Sibugay Gobernor Rommel Jalosjos ang pagpaningkamot ni Mayor Climaco nga maampingan ang maong kinaiyahan, nga garbo karon sa mga Sibugaynon. (Ely Dumaboc)
20