Mga nagmugna sa IPRA Law mo-apelar aron i-apil sa Bangsamoro Basic Law ang pagtahud sa katungod sa Lumad

DAVAO CITY – Samtang niduaw si Pangulong Benigno Aquino dinhi nga ciudad, ang katawhan Lumad ug ubang instrumento sa pagkamugna sa Indigenous Peoples Rights Act nga balaod kon IPRA Law nagtigum usab sa isa ka hotel aron paghisgot sa pamaagi nga aron ilakip ang pag-ila ug pagtahod sa katungod sa katawhang lumad dinha sa Bangsamoro Basic Law kon BBL.

Ang mao nga tigum nga giulohan og Conversation on BBL with IPRA Advocates gitambongan nila kaniadto Congressman Greg Andolana, kaniadto National Commission on Indigenous Peoples Chairman Atty. Ruben Dasay Lingating , kaniadto Commissioners Tim Alim Bandara ug Edtami Mansayagan nga karon IP Representative na ngadto sa United Nations.

Nitambong usab sila Padre Bert Alejo uban nila Joe Guintadcan, Roger Bantayan, Nonoy Cabasares, Ednar Dayanghirang, mga representate sa mga NGOs ug mga mga lideres sa kahugpongan sa mga Lumad nga gipayongan sa Lumad Mindanaw Peoples Federation (LMPF) pinangulohan ni Jimid Mansayagan.

Ang mga sakop sa LMPF ug sa ubang nanambong nga mga instrumento sa pagkamugna sa IPRA Law nibati og  dakung kabalaka nga mayatakan ang katungod sa katawhang lumad nga nanimuyo sulod sa mga dapit nga mahisakop sa Bangsamoro.

Si Datu Sayot Masandil sa Sultan Kudarat nag-ingon nga ang tulo ka tribu nga Teduray, Dulangan ug Lambangian nga nanimuyo sulod sa ilang lumadnong kayutaan nga adunay gilapdon nga sobra 220,000 ektaryas mahisakop na sa Bangsamoro.

“Simple ug hamubo ra man unta ang among hangyo nga isulat nga pulong dinha sa BBL, sama sa, “Pagtahud sa Katungod sa Katawhang Lumad base sa kasamtangang balaod nga Indigenous Peoples Rights Act subay sa akta Republika 8371,” matud pa Datu Tagulambong Prudencio Mansigue.

Matud pa ni Sarx Lanos, ang information officer sa LMPF, nga pagsugod pa lang sa pagpanday sa BBL gikan pa sa FAB kon Framework Agreement on Bangsamoro padulong sa CAB kon Comprehensive Agreement hangtod nga ni-abot na sa BBL wala gihapon masulat ang pag-ila ug pagtahod sa katungod sa Katawhang Lumad dinha sa Bangsamoro Basic Law.

Gusto sa Lumad Mindanaw Peoples Federation ug sa IPRA Advocates nga maapil gayud ang pagsulat dinha sa Bangsamoro Basic Law ang pagrespeto ug pag-ila sa katungod sa Katawhang Lumad base sa IPRA Law. (Mindanao Examiner)