CEBU CITY – Mokabat sa 103 ka mga molupyo sa dakbayan sa Sugbo ang nakadawat og titulo sa luna nga ilang gipuy-an sa dugay’ng panahon human gipang-apod apod kini sa pagpangulo ni Mayor Michael Rama diha sa ganghaan sa City Hall Legislative Building sa Plaza Sugbo.
Kabahin sa nakadawat sa ilang Original Certificate of Title mao ang mga residente sa Barangay Tinago nga may 16 ka mga benepisyaryo ug Barangay Duljo Fatima nga aduna usab kiniy 16 nga pulos pinaagi sa Residential Free Patent program.
Samtang nakadawat usab sa ilang Transfer Certificate of Titles ang 17 ka molupyo sa Barangays Kasambagan, ingun man ang 34 ka mga residente sa Barangay Bulacao og kini pinaagi sa socialized housing program nga pinaagi sa Division for the Welfare of the Urban Poor.
Nakadawat usab ang19 ka mga residente gikan sa Barangay Pasil ug laing tulo gikan sa Barangay Mambaling nga mga benepisyaryo sa slum improvement and resettlement program.
Gipadayag sa pangulo sa Land Management Council nga si Atty. Jade Ponce nga ang maong pagpang-apod apod sa titulo kabahin kini sa pagtuman sa kamanduan sa mayor ubos sa “land to the landless” program nga manghatag og usa ka libo ka titulo karung tuiga ngadto sa mga kabus nga pamilya nga dugay nang nagpuyo sa mga luna nga gipanag-iya sa gobyerno kun public land.
Gibutyag ni Ponce nga aduna pay laing kapin sa 200 ka mga applications ang kasamtangang gi proceso diha sa Department of Environment and Natural Resources ug sa Register of Deeds kinsa mao usab ang partner sa dakbayan sa pagpatuman sa maong programa.
Malaumon si Ponce nga makuha ra ang orden sa mayor nga usa ka libo ka titulo kun walay masugatang mga kakulian sa proseso hilabi na sa mga rekisito niini.
Nidugang si Ponce nga mag-agad usab ang LMC sa kooperasyon sa mga aplikante hilabi na pagbayad sa mga regulatory fees niini sa mga ahensiya ug ubang mga rekisitong gipangayo sama sa approved plan sa maong mga luna.
Nasayran nga nakapang-apod apod na ang dakbayan og 62 ka susamang mga titulo niadtong Pebrero sayo ning tuiga. (Cebu Examiner, Elite)
Like Us on Facebook: https://www.facebook.com/
Follow Us on Twitter: https://twitter.com/
Read Our News on: http://www.mindanaoexaminer.
20