CEBU – Nimugna si Presidente Benigno Aquino og national organizing committee alang sa pagbisita ni Pope Francis sa Tacloban City sa Leyte sa Enero.
Ubos sa Memorandum Circular No. 72, gimugna ang Papal Visit 2015-National Organizing Committee (PV-NOC) diin gitudlong mangulo si Executive Secretary Paquito Ochoa Jr. samtang vice chairperson si Foreign Affairs Secretary Albert Del Rosario.
Atimanon sa PV-NOC ang mahimong partisipasyon sa gobyerno sa pagbisita sa Santo Papa apil na ang paghatagan og seguridad ug paghikyad og epektibong traffic management.
Apil sa mga miyembro sa komite ang mga kalihim sa Department of National Defense, Department of Interior and Local Government, Department of Public Works and Highways, Department of Health, Department of Transportation and Communications, Department of Tourism ug Presidential Communications Operations Office.
Parte usab niini ang Armed Forces of the Philippines, Philippine National Police ug Metropolitan Manila Development Authority.
Makig-alayon ang PV-NOC partikular sa Central Committee sa Catholic Bishops’ Conference of the Philippines nga maoy manguna sa tanang religious plans ug uban pang aktibidad sa pagbisita sa Santo Papa.
Nakabutang usab sa memorandum circular ang pagmugna og duha ka local executive committees: ang EXECOM Manila ug EXECOM Leyte, ang mga lugar nga bisitahon sa Santo Papa sa nasud.
20