‘Atay ng Maguindanao massacre suspek, nilalamon ng cancer’
MANILA – Bilang na umano ang oras ni Maguindanao massacre suspect Andal Ampatuan Sr matapos diumanong makitaan ito ng cancer sa kanyang atay.
Ito ang sinabi ng kanyang abogado matapos na maglabas ng medical certificate ang umano’y doktor ni Andal, na dating gobernador ng Maguindanao, na nagsasabing 3 hanggang 6 na buwan na lamang ang itatagal nito sa mundo.
Kasalukuyang nasa National Kidney and Transplant Institute (NKTI) si Andal na kung saan ito sinusuri sa kanyang sakit. Nais naman ngayon ng mga kaanak ni Andal na ito’y madalaw sa pagamutan, subali’t kailangan pa umano ng permiso mula sa korte.
Pinagbibintangan na mastermind si Andal sa massacre ng 58 katao, kabilang ang 32 mamamayahag, na sumama sa political caravan ng angkan ng Mangundadatu na kalaban naman nito sa pulitika. Kasama sa naturang kaso ay sina Zaldy Ampatuan, ang dating gobernador ng Autonomous Region in Muslim Mindanao; at ang kapatid nitong si Junior Andal, at iba pa.
Nabatid sa kanyang medical certificate na nasa advance stage na ang cancer ni Andal na kilalang malakas manigarilyo.
Ngayon ay nais naman ni Zaldy na magpa-confine at magpasuri sa puso sa Philippine Heart Center na katabi lamang ng NKTI sa Quezon City, at humirit pa itong na bibisita sa amang may sakit. Hindi pa napagde-desisyunan ng korte ang nasabing kahilingan ni Zaldy at ng mga kamag-anakan nitong bumisita kay Andal.
Nakapiit si Zaldy at Junior Ampatuan at iba pang akusado sa Camp Bagong Diwa sa Taguig City na kung saan ay napa-ulat na may special treatment ang mga ito.
Hindi naman sang-ayon ang marami sa mga kaanak ng mga biktima ng massacre sa kagustuhan nina Zaldy at nanawagan pa sa mga awtoridad na higpitan ang seguridad sa NKTI.
Umani rin ng samut-saring komento sa social media, partikular sa Facebook, ukol sa nalalapit na kamatayan ni Andal at karamihan sa mga ito ay ipinapanalangin na matigok na ang matanda dahil sa mga umano’y kasalanan nito, at ang iba naman ay nagsasabing humaba pa sana ang kanyang buhay upang maghirap at malasap ang pait at pighating dinanas ng mga pamilya ng mga biktima ng karumal-dumal na pagpatay sa 58 katao noon 2009.
May mga naaawa rin sa sinapit ni Andal at nagsabing dapat ay humingi na ito ng kapatawaran sa kanyang mga kasalanan.
Nitong Mayo lamang ay pinalaya ng korte ang isang anak ni Andal na si Sajid Islam matapos itong magbigay ng piyansa sa halagang P11.6 milyon at halos 5 taon rin itong nakulong. Dinagsa ng mga bisita at supporters ang lalawigan upang salubungin at batiin ito sa kanyang pagbabalik. (Mindanao Examiner)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/
Share The News
20
