DAVAO CITY – Gilihok karon sa mga sakop sa National Transformation Council ang pagpalagpot gikan sa iyang katungdanan sa pagka Pangulo sa nasud si Benigno Aquino ingon man si Bise Presidente Jejomar Binay ug tanang senadores ilabina kadtong mga napili sa 2013 nga eleksyon.
Kini ang laraw nga gibutyag atol sa asembleya sa NTC nga gapahigayon dinhi nga ciudad, Pebrero 8 tinambongan nila kaniadto Senador Kit Tatad, security adviser Norberto Gonzalez, Bishop Fernando Capalla, Pastor Art Corpus sa UCCP, kaniadto Kongresman Glenn Chong sa Biliran Leyte ug representante sa nagkalainlaing sector.
Giingon ni Chong nga ang pagkalingkod karon sa nasudnong mga opisyal nahitabo gumikan sa pagmani-obra sa Precinct-Count Optical Scanners nga giprograma aron magpagawas sa tinumotomo nga resulta sa mga boto sa eleksyon niadtong 2013 nga pinili-ay.
Matud pa ni Chong nga ang iyang grupo naghupot karon ug daghang ebidensya aron pagmatuud nga ang resulta sa eleksyon nga gilowa sa PCOS dili gayud tinuod.
“Aduna kami resulta gikan sa matag precinto mismo, mga sumada nga botos sa matag munisipyo, ciudad ug probinsya, apan lahi ang nigawas nga sumada gikan sa PCOS,” matud ni Chong.
Dugang gibutyag niya nga kung ang media ang mangutana sa Commission on Elections bahin sa mao nga hitabo, ingnon nga wala tayong ebedinsya, apan sa dihang iyang gipakita sa mga ebidensya sa sukwahi nga resulta nga gilowa sa PCOS, ang taga-COMELEC moingon nga kulang na tayo sa panahon sa pag-imbestiga.
Giingon ni Gonzales nga daghang sayop nga gihimo ni Aquino nga husto na nga basehan sa pagpalagpot kaniya ug dili na angay hulaton pa ang pinili-ay sa 2016.
Giingon usab ni Tatad nga repormahon gayud ang COMELEC aron makahimo ug hustong pamaagi sa pag-ihap sa mga bulawanong boto sa katawhan kay kung dili mareporma ang poll body walay pulos ang matag eleksyon kay ang mangdaug mao ang dili tinuod nga giboto sa tawo. (Mindanao Examiner)
20