Image from fanpop.com
PAGADIAN CITY (Mindanao Examiner / Jan. 16, 2013) – Nahaharap sa kasong kriminal ang isang ina matapos nitong mapatay sa bugbog ang paslit na anak sa bayan ng Dumalinao sa Zamboanga del Sur.
Sa ulat ng pulisya ay nabatid na ginulpi ng inang si Ritchie Remasog, 24, ang anak sa loob mismo ng kanilang Bahay sa Barangay Baga at sa kabila ng pagsusumamo ng bata ay tila bingi ito. Wala rin nagawa ang mga kapit-bahay sa pagmamalupit ng ina.
Nabatid pang naisugod sa pagamutan ang 8-buwang bata dahil halos hindi na ito makagalaw sa tinamong mga pasa sa katawan. Subalit sa murang katawan ng bata ay hindi nito nakayanan ang matinding gulpi na tinanggap mula sa ina.
Hawak na ng pulisya ang ina at ngayon ay nakapiit na sa Zamboanga del Provincial Jail, ayon kay PO2 Cyril Macasasa.
Base sa imbestigasyon ng pulisya ay may diperensya sa utak ang babae at pasulpot-sulpot ang sakit nitong namana pa umano sa ina.
“Base sa imbetigasyon ni PO3 Maricar Felina ay may diperensya ang ina, pero kinasuhan pa rin namin siya sa pagkakapatay sa bata at ang korte na ang siyang magdedetermine nito,” ani Macasasa sa panayam ng Mindanao Examiner.
Nabatid pang battered wife ang babae at nakasuhan na rin noon ang asawa ng physical abuse, ngunit wala rin nangyari sa asunto.
Nagulat na lamang ang lalaki ng ito’y umuwi sa kanilang bahay matapos ng isang linggong paglalayas na iba na ang ikinikilos ng asawa hanggang sa bigla na lamang pinaghahataw ang sanggol. (Mindanao Examiner)
20