CEBU CITY – Kabahin sa misyon sa pang-gobiyerno ni Cebu City Mayor Michael Rama mao ang pagdala sa batakang serbisyo sa City Hall ngadto sa ganghaan o kaugalingong tugkaran sa mga Sugbuanon. Dili man kini literal nga tugkaran sa ilang mga panimalay apan ngadto gayod sa ilang mga barangay.
Agig pag tuman niini, gimandoan ni Mayor Rama ang Frontline Cluster Services sa City Hall sa pagpahigayon ug senemana nga community outreach nga mas nailhang ‘City Hall at Your Doorstep,’ kon ‘Piyesta sa Pagpangalagad,’ diin matag adlawng Biyernes dalhon ang mga serbisyo sa 22 ka mga departamento sa City Hall ngadto sa mga kabarangayan niining dakbayan.
Kanunay nga gibalik-balik sa Mayor nga: “Ato kining buhaton lukop ning dakbayan, kamong katawhan angay gayod hatagan sa tim-os nga pangalagad sa ngalan sa tiunay nga serbisyo. Ako lang hangyo nga tabangan ko ninyo diha sa pagtul-id sa hiwi, pagnindot sa bati, paglimpiyo sa hugaw, pagwagtang sa baho, ug paghan-ay sa gubot.”
Kahinumduman nga miabot ngadto sa kapin sa 500 ngadto sa liboan ka mga lumulopyo kada barangay ang naka benepisyo ning libreng mga batakang pagpangalagad nga gidala sa maong outreach program.
Ang maong programa nagahatag ug batakang panerbisyo sa katawhan sama sa libreng kosultasyon sa rehisro sa pagkatawo, pagpakasal, ug pagkamatay; libreng tuli alang sa mga kabataan; libreng medikal nga konsultasyon, ug pag-ibot sa ngipon; pagpang limpyo sa mga kanal ug drainage; pagpanaod ug pagpang-ayo sa mga street lights; libreng rehistro, kapon ug bakuna sa mga iro ug iring; libreng laboratory services sama sa blood-typing ug blood sugar testing; libreng feeding sa mga kabataan; libreng pagpanghatag ug mga seedlings ug nagkadaiyang mga tambal; ug libreng seminar sa epekto sa pagamit ug ginadiling druga, traffic rules, mga kalambuan sa dakbayan, ug uban pa. (Greggy Jiggs Senados)
Like Us on Facebook: https://www.facebook.com/
Follow Us on Twitter: https://twitter.com/
Read Our News on: http://www.mindanaoexaminer.
20