ZAMBOANGA DEL NORTE (Mindanao Examiner / Aug. 4, 2014) – Patay ang isang ginang at sugatan naman ang isang lalaki sa hiwalay na pamamaril sa Dipolog City sa Zamboanga del Norte province.
Sinabi kahapon ni Insp. Dahlan Samuddin, ang regional police spokesman, na parehong under investigation ang dalawang kaso na naganap ilang oras lamang ang pagitan nitong Linggo ng gabi.
Nauna umanong nabaril ng mga “riding-in-tandem” si Juancho Regencia, 43, sa Purok Evergreen sa Barangay Santa Felomina na kung saan ay tinugis ito ng mga salarin habang sakay ng kanyang motorsiklo.
Ilang beses na pinaputukan si Regencia at nahagip ito ng isang beses sa katawan, ngunit nakuha pa nitong tumakas at magtungo sa pagamutan.
Ngunit hindi naman sinuwerte si Alma Tan, 43, at napaslang ito sa loob ng kanilang bahay sa Malvar St. sa Barangay Miputak. Karga-karga pa ni Tan ang kanyang sanggol ng ito’y barilin sa kanyang ulo ng salarin. Hindi naman nasaktan ang anim-buwang sanggol.
Nabatid kay Samuddin na tumaya pa ang salarin ng ‘swetres’ sa live-in partner ni Tan na si Eddie Rinos at matapos nito ay tumambay ito sa labas ng bahay at hihintayin umano ang resulta ng bola sa swetres.
Ngunit ng makita ang babae na umupo sa sala at manood ng telebisyon ay doon na umano tumira ito ng salarin. Sa bintana mismo sa labas ng bahay pumuwesto ang lalaki at saka inupakan si Tan.
Mabilis rin na tumakas ang salarin matapos ng pamamaril, ayon sa pulisya. Hindi pa mabatid ng awtoridad ang motibo sa dalawang krimen, ngunit talamak ang barilan at patayan sa Dipolog City. (Mindanao Examiner)
20