SI KANHI Special Assistant to the President Christopher Lawrence “Bong” Go nagpasalig sa katawhan sa Laguna nga ang probinsya makadawat sa iyang bahin nga makiangayon sa mga proyektong pangkalamboan sa gobyerno samtang iyang gipanaad nga magsilbe siya kanila isip ilang diretso nga koneksyon ngadto kang Presidente Rodrigo Duterte.
Si Go, kandidato pagka senador sa ekeksyon sa 2019, ninghimo sa maong pamahayag sa okasyon sa iyang pagtambong sa Seminar- Lecture on Community Mobilization Project Orientation nga gihimo kagahapon sa Calamba City sa Laguna. Usa ni ka programa nga ang tumong mao ang pagpataas sa abilidad sa mga lokal nga opisyales sa paghimo sa ilang mga tahas isip tigpadagan sa yunit sa gobyerno kun asa sila gidestino.
Kuyog sa pagdawat ug pag-abi-abi kang Go si Gob. Ramil Hernandez sa Laguna, Kong. Joaquin Chipeco Jr., mga mayor sa mga lungsod ug syudad sa probinsya, mga opisyales sa kapulisan, ug ubang local nga opisyales. “Duol kining Laguna sa among kasingkasing ni Pangulong Duterte,” matud pa ni Go sa usa ka interview.
“Ayaw mo og kabalaka kay ang inyong mga imprastruktura dinhi mahimong parte sa Build Build Build nga programa sa gobyerno ug duna kitay tukuron nga mga imprastruktura nga mopakunhod sa trapiko labi na gyud sa nagabiyahe padulong sa Laguna tungod kay silingan lang ni sa Manila,” dugang pa niya.
Pipila sa gihinganlan ni Go nga proyekto mao ang P124.1 bilyon PNR South Commuter Line, nga bale og 72 kilometro sa de-kuryente, double-track nga Sistema sa riles gikan sa Manila ngadto sa Los Baños, ang tuyo mas paspas ug way trapik nga transportasyon gikan sa Manila ngadto sa Laguna ug pabalik. Ang detalyadong Engineering Design para sa proyekto gilauman nga makompleto karong bulana.
Iya sab nga gihisgotan ang proyekto sa PNR South Long-Haul nga mokonekta sa Manila ug Bicol, moagi og Los Baños sa Laguna ug momubo sa biyahe gikan sa Manila ngadto sa Legazpi City og lima ka oras lamang, imbes kapin napulo ka oras; ang Phase 1 sa Metro Manila Subway Project para sa 25.3 kilometro nga underground rail nga magserbisyo isip North-South rail backbone para sa National Capital Region, Bulacan, Cavite, Laguna, ubp.
Iyang gidugang sa paghisgot ang Cavite-Laguna Expressway, usa ka four-lane, closed-system toll expressway nga nagakonekta sa CAVITEX gikan sa Kawit ug SLEX sa Mamplasan Interchange sa Biñan, Laguna. Gilauman nga mopakunhod ni sa kahuot sa trapiko labi na gyud sa Governor’s Drive, Aguinaldo Highway, ug Sta. Rosa-Tagaytay Road. Bale og 21.694% na ang nahuman sa konstruksyon sa Laguna nga bahin sa karsada.
Sa iyang pakigpulong atubangan sa mga nangapil sa Seminar, gisuportahan ni Go ang lihok nga himoon nga bugtong distrito nga makapadala og deputado ngadto sa Kongreso ang Calamba isip kabahin sa mas dako ug pangkinatibuk-ang pagpursige sa kalamboan sa probinsya. Sa maong okasyon, giawhag ni Go ang mga lokal nga opisyales sa pagpadayon sa ilang pagsuporta sa kampanya ni Presidente Duterte batok sa ilegal nga droga.
“Tabangan nato si Pangulong Duterte nga humanon ang giyera kontra sa droga,” ni Go pa. “Usa ra ang tumong namo ni Pangulo. Wala kami laing interes gawas sa paghatag sa among serbisyo sa katawhang Pilipino.”
Isip kandidato pagka senador, hugot nga nanaad si Go nga ipadayon niya ang pagsuporta sa mga programa ni Presidente Duterte ug kabahin sa iyang agenda sa gimbuhatong lehislatibo mao ang kombati kontra sa ilegal nga droga, krimen ug kurapsyon.
Sa iyang pagpasabot sa iyang mga damgo para sa nasud, giesplikar ni Go nga iyang pangusgan og duso ang Magna Carta para sa mga opisyales sa barangay, apil na ang paglugway sa ilang mga termino; ang pagpursige sa kalinaw ug kahusay pinaagi sa paglunsad og mga localized peace talk aron malikayan na ang dugang nga pagbanaw sa dugo, pagrebyu sa Juvenile Justice Law aron pugngan ang mga kriminal nga mopahimulos ug mogamit sa mga kabatan-onan.
Gidugang ni Go paghisgot ang iyang health agenda diin kabahin ang iyang pagduso sa balaod nga momugna og mga Malasakit Center sa kada probinsya ug sentrong syudad sa nasud ug mogahin og dugang pundo para sa dugang katre sa mga public hospital aron mas molambo pa ang serbisyo alang sa maayong panglawas.
Ang Malasakit Center usa ka one-stop shop diin ibutang ilawom sa usa ka bubong ang tanang ahensya sa gobyerno nga magkalambigit ang mga tahas ug trabaho sama sa DOH, DSWD, PAGCOR, PSCO, ug Philhealth aron mas hanoy, paspas ug mas sayon sa mga kabus ug hinikawan nga pasyente sa pagpangita og tabang medikal ug pinansyal gikan sa gobyerno.
Matud pa ni Go, usa ka Malasakit Center patindugon sa Laguna Medical Center aron moatiman sa mga panginahanglang medikal sa katawhan sa probinsya. Mao kini ang ikaduha nga tukuron sa rehiyon human sa bag-o lang nga gilunsad nga Malasakit Center sa Batangas dili pa lang dugay.
Ang ubang mga prayoridad ni Go sa iyang agenda nga panglehislatibo mao ang edukasyon, puloy-anan para sa mga kabus, agrikultura, paglikay ug proteksyon gikan sa sunog, malahutayon nga pagpalambo sa paugnat sa kusog, pagmugna og usa ka Departamento sa OFW, ug mas lambo nga benepisyo para sa mga senior citizens. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com
Mirror Site: https://mindanaoexaminernewspaper.blogspot.com
Digital Archives: https://issuu.com/mindanaoexaminernewspaper
See Media Rates: https://mindanaoexaminer.com/ad-rates
20
