CEBU – Sa katapusang higayon, giuswag sa Bangko Sentral ng Pilipinas (BSP) ang deadline kanus-a ang publiko mamahimong maka papuli sa ilang mga daan nga papel de bangko nga dili na dawaton sa 2019.
Matud sa information officer sa BSP nga si Hazel Cultura, ang desisyon sa ika lima na nga pag-uswag, nagasukad sa hukom sa Monetary Board sa BSP human sa labing bag-o niining board meeting. Namatikdan sa mga sakop sa Monetary Board nga bisan na sa mga gikatakdang mga deadline sa pagpa-ilis, daghan pa gihapon nga konsumidor nga naghupot sa mga da-an’g kwarta.
Daghan pa usab sa mga Overseas Filipino Workers ang wala pa makapa-ilis sa ilang mga kwartang nadala sa gawas, hinungdan nga gihatagan gihapon sa higayon, dugang sa BSP.
Apan hangtud sa Disyembre 29 na gyud ang katapusang palugit sa BSP aron madawat pa sa mga bangko ang New Generation Series (NGS) nga angayan na nga pulihan kay mawala nay bili human ning adlawa, dason ni Cultura. Gilauman sa BSP nga ang katapusang palugit, magtanyag sa publiko sa ilang gilauman nga pagpa-ilis sa ilang mga kwarta samtang may bili pa.
Kahinumduman nga una na nga gilansang sa BSP ang ilang giingon nga labing katapusang deadline sa Hunyo 30 nga makapa-ilis sa ilang mga gihuptang kwartang daan na. Hinuon, adtong panahona, ang BSP midawat pa sa mga gipailisan nga mga daang kwarta nga gikan sa mga kabangkohan sa tibuok nasud taman sa Septembre 30.
Kini aron human sa Hunyo 30, may igo pang panahon ang mga bangko nga makapadala sa ilang nakolektang inilisan nga kwarta ngadto sa BSP, pasabut ni Cultura. Gani, sa katapusang palugit, inay nga ang BSP lamang ang mahimong modawat sa kwartang pa-ilisan sa katapusang giplastar nga deadline, mipagawas usab og laing advisory memorandum ang BSP ngadto sa mga bangko nga boluntaryong modawat na usab sa daang kwarta gikan sa mga magpa-ilis.
Sukad niadtong Septembre, matud sa BSP nga may kapin sa 8% pa gihapon sa mga napatik nga NGS nga kwarta ang wala pa mahibalik sa kagamhanan. Milaum ang BSP nga sa gitanyag nga palugit, mahibalik na kanila ang mga nahibiling kwarta tungod kay mahimong kadtong naghupot pa niini, mahimong naghupot na lamang sa papel nga walay bili sa 2018. (Rey Anthony Chiu)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com /http://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper
20
