CEBU – Ang Bangko Sentral ng Pilipinas o BSP nagpahibalo sa publiko nga gisugdan na ang “demonetization” o pagwagtang sa balor sa karaang kwartang papel nga “New Design Series” o NDS subay sa Section 57 sa Akta Republika 7653 nga nailang Central Bank Act.
Subay sa maong balaod, ang BSP gihatagan ug gahom sa pag-ilis sa kwartang papel nga naa sa sirkulasyon sobra sa 5 ka tuig.
Ang sirkulasyon sa atong kwartang papel nga NDS niabot na hapit tulo ka 3 ka dekada. Mao kini ang pahibalo ni Gregorio Baccay lll, Senior Research Specialist, Economic and Financial Learning Center sa Bangko Sentral ng Pilipinas, Dumaguete City branch atol sa gihimong Kapihan sa PIA forum sa BSP.
Subay niini, ang publiko gipahimangnuan nga ang karaang kwartang papel mahimo pang gamiton pambayad o pamalit sa mga produkto, serbisyo ug uban pang transaksyon hangtod Disyembre 31, 2015, human niining petsaha, ang NDS dili na mahimong gamiton.
Sugod sa Enero 1, 2015 hangtod Disyembre 31, 2016, ang karaang kwartang papel nga NDS mahimo na nga pailisan sa bag-ong kwartang papel nga New Generation Currency (NGC) sa tanang bangko, (universal, commercial, thrift, rural ug cooperative banks) o sa nagkalain-laing buhatan sa BSP.
Ang mga pampublikong buhatan nga naghupot sa karaang kwartang papel nga NDS nga dili mahimong pailisan sulod sa gitakda nga panahon, sama sa gigamit nga ebidensya sa korte, kinahanglan nga makiglambigit sa Bangko Sentral ng Pilipinas sa dili pa mulapas ang petsa nga gitakda sa pagpa-ilis sa kwarta aron mahatagan ug hustong panahon sa pag-pailis.
Alang sa mga overseas Filipinos nga may NDS nga dili mailisan sulod sa gitakdang panahon, giawhag sa pagparehistro online sa BSP website sugod Oktubre 1 hangtod Disyembre 31, 2015 aron mahatagan ug higayon sa pag-pailis.
Ang kwartang NDS may tagal lamang nga usa ka tuig gikan sa pagrehistro sa BSP website. Sugod Enero 1, 2017, ang NDS wala nay balor kay kini demonetized na. Ang pagwagtang sa balor ug ang pagkuha sa kwartang papel nga NDS sa sirkulasyon naghatag ug kaseguruhan nga usa ra ka serye sa kwartang papel ang gamiton sa tibook nasud.
Ang bag-ong kwartang papel o NGC nga giulsad niadtong Disyembre 16, 2010 gi-ila sa ubang nasud nga may de kalidad nga disenyo ug taas ang seguridad alang sa kaseguruhan sa publiko batok sa mga tigpakatap sa peke o mini nga kwarta. (MBCN)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and http://www.mindanaoexaminer.net/
Share The News
20
