DIPOLOG CITY – Mapasalamaton ug daku si Dipolog City Mayor Evelyn Uy ngadto kang Col. Amadio Azul, Jr. ang bag-ohay pa lamang gi-instalar nga Brigade Commander sa 101st Inf antry Brigade dinhi sa Zamboanga del Norte gumikan sa pagbisita niini isip pagtahod ngadto sa inahan ning dakbayan.
Nasayran sa Buhatan sa Impormasyon nga ang pagduaw ni Col. Azul maoy sumpay sa kasabutan nga nahauna nang na-oyunan sa 3 ka grupo, ang City Government of Dipolog, Armed Forces of the Philippines ug ang Philippine National Police. Matud pa nga buot sa maong grupo nga mapabilin niini ang kahapsay ug kalinaw sa siyudad.
Dugang pa niini, buot usab ni Col. Azul nga ipahibalo sa tanang katawhan dili lamang dinhi sa dakbayan, kundili lakip na usab ang tibuok probinsiya sa Zamboanga del Norte, ang kasamtangang palisiya sa 101st Brigade Commander nga gitawag ug “Internal Peace and Security Plan: Bayanihan” diin tinguha sa grupo nga makahimo ug “harmonious relationship” ngadto sa mga residente dinhi.
Dugang pa nga prayoridad usab nila nga mapabilin sa seguridad sa “tri-boundary” o ang boundary sa Misamis Occidental, ang boundary sa Zamboanga del Norte ug Boundary sa Zamboanga del Sur.
Nunot niining maong kalambuan, nagpasalamat usab si Col. Azul sa tanang lideres sa Moro Islamic Liberation Front tungod sa malampusong paglagda ug kasabutan tali sa nasudnong kagamhanan aron mahuman na ang kagubot sa Mindanao. Gihangyo usab ni Col. Azul ang grupo sa Moro National Liberation Front nga mo-uyon usab sa nahimong kasabutan tali sa MILF ug nasudnong kagamhanan aron malikayan na usab ang pag-usbong sa gubat dinhi diin daghanan na usab nga mga sibilyan ang ma-apektuhan.
Kini tungod kay matud pa ni Col. Azul, adunay mga miyembro sa MILF ug MNLF ang nagapuyo sa ilaha karong “area of responsibility.”
Dugang usab siyang nagpasalamat ngadto kang Mayor Uy gumikan sa maayong pag-abi-abi ngadto kaniya ug sa iyang tropa, ingon man sa pag-imposar ug maayong pangagamhanan dinhi sa dakbayan diin usa ang AFP sa gitugutan sa inahan ning dakbayan nga mamahimong katambayayong dinha sa pagmintinar sa seguridad sa kahapsay ug kalinaw dinhi. (Dipolog City Information Office)
20