PAGADIAN CITY – Laing na usab nga kadungganan ang na-angkon karon sa dakbayan sa Dipolog human kini ang nahimong ikapito nga dakbayan nga giilang mga “Top Performing Cities” ilawom sa Component Cities category, bag-ohay pa lang.
Kining maong kalamboan ang gikompirmar sa nasudnong buhatan sa DILG ilawom sa pagdumala ni kalihim Mar R oxas. Sumala pa nga mokabat sa katlo-an ka mga dakbayan ug kalungsoran dinhi sa nasud ang mitumaw isip mga consistent top performers dinha sa lokal nga pangagamhanan sulod sa nakalabay’ng tulo ka mga katuigan.
Matud pa nga ang maong pag-ranking ang gipasikad ilawom sa Local Governance Performance Management System nga giilang usa ka kahimanan alang sa pagdumala ug paglambo nga maoy mo-ila sa kapabilidad ug mga limitasyon sa mga lokal nga kagamhanan dinha sa paglugway ug serbisyo ngadto sa publiko, nga nagahatag usab sa mga tukmang impormasyon kalabot na sa nahimong agi sa mga kagamhanang lokal dinha sa pagpangalagad niini.
Subay ning maong kalamboan, nasayran nga ang dakbayan sa Dipolog ang nakadawat sa performance area index nga 4.83 ilawom sa component city category, uban sa dakbayan sa Laoag, nga mao’y una, uban sa performance rating nga 4.99; Naga, 4.93; Vigan, 4.921; Ligao, 4.917; Tagaytay, 4.87 ug Cabanatuan, 4.86.
Matud pa nga dugang gikalipay ni City Mayor Evelyn Uy ug giisip niini nga mas nahimo pa gayung dakong dungog alang sa atong dakbayan, nga sa pito ka nga dakbayan ilawom sa “component cities category” nga giila sa nasudnong buhatan sa DILG isip mga Top Performing Cities, sulod sa nakalabay’ng tulo ka mga tuig, bugtong ang Dipolog City lamang ang nahilakip ning maong pasidungog nga nagagikan dinhi sa isla sa Mindanao, diin ang unom ka mga kauban niining mga dakbayan ang pulos nagagikan sa isla sa Luzon. (Dipolig City Information Office)
20