DAVAO ORIENTAL (Mindanao Examiner / Feb. 8, 2014) – Mogahin og dakung kantidad si Mayor Justina Yu dinhi nga lungsod sa San Isidro aron iganti ngadto sa mga barangay nga aktibo ug maayong modumala sa hustong paghipos sa mga basura.
Kini ang gibutyag ni Mayor Yu atubangan sa mga kapitanes ug sa sobra 200 ka mga Barangay Health Workers (BHWs) nga nanambong sa oryentasyon mahitungod sa hustong paagi sa pagdumala sa basura nga gipahigayon didto sa Convention Center dinhi nga lungsod.
Matud pa sa Mayor nga kinahanglan gayud nga hatagan og dakung gibug-aton ang paghipos sa mga basura sa husto nga paagi ug kinahanglang ang dakung pag-abag sa mga opisyales sa barangay ug mga purok.
Si Mayor Tina Yu nga bag-ohay pa lamang nahibalik gikan sa pagtambong sa usa ka tigum didto sa Manila, iyang giingon nga sa mao nga tigum daghang mga Kabinete ni Pangulong Pnoy Aquino nga nanambong usab ug nangumosta kaniya kung unsa nay iyang lakang karon mahitungod sa Solid Waste Management (SWM).
“Didto kami nagtigum sa isa ka 5-Star Hotel sa Manila ug ang gihimo nga flower base sa mao nga hotel mao ang plastic nga basiyo sa baligyang tubig, gikuha ang panit nga maska sa tubig, gipulihan og putos, gibutangan og balas unya gisoksokan sa mga bulak ug mao ang gidekorasyon pagdispley ibabaw sa mga lamesa,” matud sa Mayor.
Karong umaabot nga bulan sa Hunyo, isaulog ang Araw ng San Isidro ug adunay indigay nga pagahimuon ug gantihan ang pinaka-epektibong magduma sa paghipos sa basura ug sa paghimo og mga butang ginamit ang mga mapuslan pa nga basura, sila gantihan.
Matud pa ni Mayor Yu nga ang unang mananaog nga barangay makadawat og ganti nga dili moubos sa P50 ka libo.
Ang mga kawani gikan sa buhatan ni Gobernador Corazon Malanyaon sa kapitolyo partikular sa Environment and Natural Heritage Center pinangulohan ni Provincial Government Assistant Department Head Dolores Valdesco ug sa Environment and Natural Resources Office pinangulohan ni OIC-ENRO Dante Ganir nga naglangkob nila Sarx Lanos, Leo Gene Solamo, Torts Valles ug Nestor Silva Llana inabagan sa mga kawani sa Municipal Environment and Natural Resources Office sa San Isidro nga sila MENRO Jose Dela Cruz ug Maryjane Yap, sila nanudlo sa mga Kapitanes ug mga BHW unsaon pag-ila ug paglahi-lahi sa nagkalainlaing klase sa basura.
Ang mga BHW manghatag og selopen matag panimalay aron sudlan sa basura matag adlaw sulod sa tulo ka adlaw ug timbangon aron sayron kung unsa kadaghan ang basura matag panimlay. Gitumong kini nga lihok aron mahibaw-an kung unsa kadaghan ang basura nga dili na gayud mapuslan sulod sa tibuok lungsod aron himuong basehan sa gidak-on nga pagahimuon nga sanitary landfill o kaha controlled dump facility. (Cesar Lanos)
20