DAVAO ORIENTAL (Mindanao Examiner / Mar. 19, 2014) – Sa dili madugay pagasugdan na pag-implementar ang pagtanom sa Oil Palm didto sa mga lungsod nga naigo sa bagyong Pablo nga mao ang Cateel, Baganga ug Boston.
Ang pasiunang pagtanom sa oil palm pagahimuon sulod sa 4,000 ka ektaryang kayutaan sa mga mag-uuma nga kaniadto kalubihan nga gipang-ibot sa bagyong Pablo.
Sa tigum nga gipangulohan ni Gobernador Cora Malanyaon nga gitambongan usab sa mga Regional Directors sa Department of Agriculture, Department of Trade and Industry, Land Bank of the Philippines (LBP), Philippine Coconut Authority, ug Agumill Processors nga gipahigayon Marso 19 sa Grand Conference Room sa Capitol Building, Mati City, nasayran nga ang Land Bank magpahulam og salapi nga gastoson sa mag-uuma sa pagpahinlo ug pagmintina, patanom ug sa uban pang gastohanan lakip na ang ipalit sa semelya sa oil palm.
Sa matag ektarya, mokabat ngadto sa P200 ka libo ka pesos ang magastos sa pag-ugmad hangtod nga mobunga na ang oil palm sugod sa ikalima nga tuig gikan sa pagtanom.
Ang presyo sa produkto sa oil palm magabase sa presyo gikan sa world market.
Ang pagtanom sa oil palm sa Davao Oriental isa ka proyekto ni Governador Malanyaon alang sa pagbangon sa kalungsoran nga nalusno gumikan kay naigo sa super typhoon Pablo niadtong Disyembre 4, 2012. (Cesar Lanos)
20