CEBU – Nipasidaan si Department of Interior and Local Government (DILG) Secretary Mar Roxas nga manubag gayud sa balaod ang mga gun dealers ug pipila ka opisyal sa Philippine National Police (PNP) nga nalambigit sa gun smuggling.
Nipasidaan ang kalihim human sa taho nga pipila ka armas nga angay naa unta sa kustodiya sa PNP, nadiskubreng nangawala sa PNP warehouse human sa gipahigayong imbentaryo.
Matud pa ni Roxas, sa panig sa gun dealers nga mapamatud-ang nalambigit sa gun smuggling, dili lamang pagka-bilanggo ang ilang atubangon apan bawian usab kini og permit nga maka-operate.
Sa taho sa PNP-FEO, naa sa 60 ka mga armas ang nangawala o missing sa storage facility sa FEO sa sulod sa Kampo Crame nga nagkantidad og kapin sa P11 milyon.
Matud pa sa kalihim, kun mapamatud-ang may sala usab ang mga kawani sa PNP, uban usab kini nga mapahamtangan og silot.
Gimando na sa kalihim ang padayong imbentaryo sa tanang pribadong armas nga naa sa PNP warehouse aron mahibaw-an ang gidaghanon sa mga nangawalang armas nga giingong makonsiderar na nga loose firearms.
20