ZAMBOANGA SIBUGAY (Mindanao Examiner / June 11, 2012) – Blangko pa rin ang mga awtoridad sa kinahinatnan ng dinukot na Australian national na si Warren Rodwell at bigo pa rin ang pamahalaang Aquino na mailigtas ang dayuhan na pinaniniwalaang hawak ng Abu Sayyaf sa Basilan province.
Si Rodwell, 52, ay dinukot nuong Disyembre sa bahay nito sa bayan ng Ipil sa Zamboanga Sibugay ng mga armado na nagpanggap bilang mga parak. Humihingi ng P20 milyon ransom ang mga kidnappers mula sa unang $2 milyon demand nito.
Ilang beses na rin na lumutang ang balitang nasawi si Rodwell, ngunit wala naman kumpirmasyon ito, ayon kay Lt. Col. Randolph Cabangbang, ang spokesman ng Western Mindanao Command.
“Hindi natin alam kung ano na ang nangyari kay Rodwell, pero ang huling report ng mga intell natin ay nasa Basilan ito at tuloy-tuloy naman ang paghahanap natin sa kanya,” ani Cabangbang sa panayam ng Mindanao Examiner.
Mahigpit umano ang pagtatago ng Abu Sayyaf sa dayuhan at nuong nakaraang buwan ay naglabas ito ng larawan ni Rodwell na may hawak na diyaryo.
Maging ang asawang Pinay ni Rodwell na si Miraflor Gutang, 27, ay wala rin balita ukol sa dayuhan at ni hindi umano ito binibigyan ng update ng mga awtoridad ukol sa mga isinasagawang operasyon ng mga awtoridad upang mabawi ang dayuhan.
Ilan lingo rin hinawakan ng pulisya si Gutang sa Zamboanga City sa pagbabakasakaling tawagan ito ng mga kidnappers sa cell phone at ma-trace nila ang kinalalagyan ni Rodwell. (Mindanao Examiner)
20