DIPOLOG CITY (Mindanao Examiner / Mar. 27, 2013) – Gikatakdang ipahigayon ang Diphtheria-Pertusis-Tetanus immunization karong umaabot bulan sa Abril ning tuiga alang niadtong mga kabataan nga nagpangidaron ug upat katuig ug onse ka bulan.
Nasayran ning buhatan sa impormasyon gikan ni Donabelle Velasco ang Coordinator of Expanded Program on Immunization and Animal Bite Treatment Center sa City Health Office ning dakbayan sa Dipolog . Ang nasangpit nga kalihukan ang magahatag ug prayoridad niadtong mga bata nga wala nakahuman sa ilang DPT immunization sa dihang usa pa sila ka puya. Usa kini ka follow-up booster dose diin door-to-door ang pagsebisyo niini alang sa pagsiguro sa kalamposan ning maong bakuna.
Nasayran usab nga sa matag pagbakuna, duna’y gibana-banang vaccine failure nga mokabat sa 15 %, busa aron sa pagpahugot niini, gikinahanglan gayud nga ang tanang bata nga duna’y pangidaron sa nasangpit sa unahan ang mahatagan sa maong serbisyo.
Busa subay niini, gi-awhag karon ni Velasco ang tanang ginikanan nga andamon ang ilang mga anak aron mahatagan sa nasangpit nga pagpabakuna.
Subay sa maong kalihukan, gi-awhag usab sa inahan ning dakbayan Mayor Evelyn Uy ang tanang mga ginikanan nga duna’y mga gagmay’ng anak sa pagsanong sa kalagdaan sa buhatan sa panglawas, aron ka-proteheran sa mga inahan ang ilang mga anak gikan sa mga nagkalain-laing sakit nga posibleng motumaw gumikan sa kapakyas unya sa pagpahimulos ning nasangpit nga bakuna. (CIO)
20