DIPOLOG CITY – Malampusong gipahigayon ang bansay-bansay kalabot sa Tourism Basic Statistics ubos sa pagdumala sa Department of Tourism pinaagi ni Ramil Basuel, Tourism Operation Officer, sa buhatan sa Tourism Statistics, Economic, Analysis and Information Management Division sa milabay ng Enero 15 didto sa Top Plaza Hotel ning dakbayan sa Dipolog.
Nasayran ning buhatan sa impormasyon nga ang katuyoan sa maong seminar mao ang pagtudlo sa mga lokal nga kagamhanan kabahin sa estatistika kon statistics sa mga ‘tourism destinations’ sa matag munisipyo sa usa ka lalawigan dinhi sa nasud.
Matud pa ni Basuel nga kadtong mga hingtungdang kagamhanang lokal ang gikinahanglan gayud nga matudloan sa angay o tukma nga mga pamaagi ilabi na kabahin sa ‘record keeping’ sa nagkalain-laing tourist destinations aron mahimong sayon na lamang ang pagtandi sa mga talaan aron matino kung pila ang nahimong income ug matino usab ang matang sa bisita nga nahimong customer.
Gikinahanglan usab nga magbaton ug Standard Code for Tourist Attraction sama sa Nature, History and Culture (sama sa mga monumento), Industrial Tourism, Sports, Shopping, Customs and Traditions, Special Event, Health and Wellness ug daghan pang uban.
Subay sa nasangpit nga kalamboan, nanghinaut ang inahan ning dakbayan Mayor Evelyn Uy nga ang natun-an gikan sa maong bansay-bansay ang magamit usab dinhi sa dakbayan aron dugang pang molambo ang industriya sa turismo dinhi.(CIO MECC)
20