CEBU – Adunay tanyag nga educational assistance ang Department of Social Welfare and Development (DSWD) taman P75,000 alang sa mga angayan nga benepisyaryo.
Gibutyag ni DSWD Assistant Secretary Javier Jimenez nga karon lamang nitanyag og educational assistance ang ilang buhatan tungod kay karong tuiga lamang kini gibutang sa ilang GAA.
Pasabot pa ni Jimenez, parte kini sa kapin P4 bilyon nga nasudnong pondo sa DSWD. Alang kini sa gitawag nga Crisis Intervention Program, gi-gahin alang sa mga indibidwal ug pamilyang nakasinati og krisis o emergency situations.
Ubos niining programa, apil sa mga tanyagan og ayuda mao ang pagpa-lubong, medikal, transportasyon, mga pagkaon o butang man ug ang educational.
Giingong prayoridad niini ang mga naa sa listahanan o National Household Targeting System, informal settler families ug ang mga naapil sa general category nga “poor, disadvantaged ug vulnerable.”
Gikinahanglan lamang ang mga mosunod: certificate of enrolment o registration form, student ID sa gusting mahimong benepisyaryo, certificate of indigency gikan sa barangay ug valid ID sa aplikanteng nag-proseso niini.
Ang kantidad nga mahimong makuha alang sa educational assistance mao ang mosunod: P5,000 (makuhang cash sulod sa 1 hangtud 2 ka adalw); P6,000-P10,000 (makuhang tseke ug kinahanglang aprubahan sa assistant regional director sa DSWD Central Office); P25,000 (kinahanglang mo-agi og pag-aprubar sa regional director); ug P75,000 (alang sa “extremely justifiable cases” apan kinahanglang aprubahan sa mismong kalihim sa DSWD nga si Dinky Soliman).
Pahimangno pa sa DSWD, dili na kinahanglang pa sa estudyante ang endorsement letter gikan sa bisan kinsang politiko alang niining tabang.
Apan matud pa ni Jimenez, kinahanglan og laktaw nga tulo ka buwan sa pagpangayo alang sa susamang matang sa assistance nga gitanyag sa DSWD gikan sa 5 ka kategorya – burial, medical, transportation, food o non-food ug educational assistance.
20