CEBU – Nipasidaan ang Department of Social Welfare and Development (DSWD) sa publiko batok sa nikatap nga text messages kalabot sa ilad nga raffle promo ubos sa Pantawid Pamilyang Pilipino Program.
Matud pa sa buhatan, nahibaw-an nila nga usa ka nagpailang Lyka Ramirez nga adunay numerong 0926-912-4816 ang tigpadala og text scam.
Kasagarang sulod sa maong text ang mensaheng: “Congratulations, from President Noy-Noy Aquino Foundation 4Ps Pantawid Pamilyang Pilipino Program, your sim # won P950,000 as second prize winner in the Handog Pangkabuhayan raffle promo per DTI Permit No. 9513, series of 2013. Please call me now, I am Lyka Ramirez.”
Gitumbok sa DSWD nga wala silay bisan unsang raffle draw promo.
Gi-aghat niini ang bisan kinsang makadawat sa maong text nga dili tubagon ang nagpadala ug isumbong sa pinakaduol nilang buhatan o makig-alayon sa opisyal nga Pantawid Pamilya Grievance Text Hotline nga 0918-912-2813.
Ang Pantawid Pamilyang Pilipino Program o 4Ps usa ka programa sa gobyerno nga naghatag og cash assistance sa mga kabus nga pamilya. (MBCN, ECB)
20