MIKUNHOD sa tulo ka milyong pamilyang Pilipino ang nakasinati og gutom sa unang kwarter sa tuig. Kini base sa survey sa Social Weather Stations (SWS) nga gipahigayon niadtong Marso 20 hangtud 23 sa 1,200 ka respondents.
Kapareho kini sa 13.5 porsiyento nga national hunger rate nga mas ubos og 3.7 porsiyento kun itandi sa 17.2 porsiyento o 3.8 milyong pamilya niadtong Disyembre 2014.
Matud pa sa SWS, kini na ang pinaka-ubos nga hunger incidence sulod sa 10 ka tuig sukad Mayo 2005.
Sa 13.5 porsiyento nga hunger rate, 11.1 porsiyento o 2.5 milyong pamilya ang nakasinati og moderate hunger o panagsa lang ug 2.4 porsiyento o 522,000 pamilya ang nakasinati og severe hunger o kanunay.
Gikalipay sa Malakanyang ang pagkunhod sa gidaghanon sa mga gi-gutom nga Pilipino.
Matud pa ni Presidential Spokesperson Edwin Lacierda, kini tungod na usab sa mga programa sa administrasyong Aquino ilabi na ang “Tuwid na Daan” nga gihatagan og pagtagad ang kaayohan sa publiko.
Apil sa solusyon ni PNoy ang Pantawid Pamilyang Pilipino Program nga nagtinguhang mapamaayo ang kinabuhi sa mga kabos sa nasud.
Tungod sa resulta sa pagpaningkamot sa administrasyong, miingon si Lacierda nga mas paningkamotan pa nila nga masolusyonan ang kakabos sa nasud. (Elvira C. Bongosia)
20
