CEBU – Giubsan na sa Department of Social Welfare and Development ang kwalipikasyon sa edad sa indigent senior citizens nga makadawat og P500 matag buwan nga social pension base sa Republic Act 9994 o ang Expanded Senior Citizens Act of 2010.
Sugod karong tuig, ang mga kabos nga senior citizens nga nag-edad og 65 anyos pataas, makadawat na sa maong social pension. Kaniadto, kadto lamang mga senior citizens nga nag edad og 77 anyos pataas ang makadawat sa maong pension.
Base sa balaod, ang indigent senior citizens o kadtong 60 anyos pataas ang makadawat sa binuwan nga pensiyon apan tungod sa limitadong pondo sa gobyerno, kadto lamang nagpangedaron og 77 anyos pataas ang nasulod sa maong balaod taman niadtong tuig 2014.
Alang ning tuig, ang sugyot sa DSWD nga ubsan ang age of qualification ngadto sa 65 anyos gi-aprobahan sa Kongreso ug Senado ug naapil na kini sa General Appropriations Act of 2015.
Matud pa ni DSWD Sec. Dinky Soliman, ang pag-ubos sa age requirement makatabang gayud og daku sa mga kabos nga senior citizens sa pagpalit sa ilang mga nag-unang panginahanglan sama sa medisina ug mga sustansiyadong pagkaon alang sa maayo nilang panglawas.
Alang sa 2015, ang gobyerno naggahin og P5.962 bilyon nga maka-benepisyo sa 939,609 ka indigent senior citizens nga nag-edad og 65 anyos pataas, apil na ang Autonomous Region in Muslim Mindanao.
Ang mga kwalipikadong makadawat sa maong P500 nga pensiyon kadtong mga senior citizens nga mahuyang, masakiton, o kadtong adunay disabilities; wala nagdawat og pension gikan sa Social Security System, Government Service Insurance System, o veterans pension; ug kadtong walay permanenteng source of income o regular support gikan sa pamilya o mga paryente.
Ang maong pension gipangapud-apud matag kuwarter pinaagi sa cash payment sa DSWD field offices o city og municipal social welfare and development offices. (ECB)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and http://www.mindanaoexaminer.net/
Share The News
20
