CAGAYAN DE ORO CITY – Patay ang isang guro matapos itong saksakin ng kanyang estudyante sa Cagayan de Oro City sa northern Mindanao.
Nakilala ang nasawi na si Vilma Cabactulan, ng Pedro Roa National High School, at tatlong saksak sa kanyang likuran ang tinamo nito. Nabatid na sa loob mismo ng silid-aralan pinagsasaksak ng 15-anyos na kriminal ang guro.
Sinabi ng pulisya na naganap ang krimen nitong Martes ng umaga matapos na kagalitan umano ng guro ang estudyante dahil sa madalas nitong paggamit ng cell phone sa oras ng klase. Agad naman nadakip ang batang kriminal at nabawi ang 7-pulgadang patalim na pagaari umano ng isa pang estudyante na sinasabing kasama sa nagplanong saksakin ang guro.
Naisugod pa sa pagamutan ang kaawa-awang guro, ngunit bigo ang mga duktor na masagip ang buhay nito.
Ayaw naman pangalanan ng pulisya ang kriminal dahil sa menor de edad pa umano ito. Nasa Grade 9 – Mendeleev ang kriminal na kung saan ay adviser ang guro nito. Iniimbestigahan pa ang dalawang estudyante, kabilang ang may-ari ng patalim, kaugnay sa kaso. Sinasabing nag-Jack and Poy pa ang mga ito bago maganap ang atake sa guro.
Inaalam pa kung gumagamit ng droga ang kriminal. Ibibigay umano ito sa Department of Social Welfare and Development, ngunit nangangamba ang pamilya ng guro na baka tumakas ang estudyante at magtago. (Mindanao Examiner)
Like Us on Facebook: https://web.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com / http://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper
20
