DAVAO ORIENTAL (Mindanao Examiner / July 22, 2014) – Ang mga sakop sa kahugpongan nga Lumadnong Asosasyon sa Nagkahiusa pag Oswag ug pag Serbisyo sa Kinaiyahan, sa ilang tumong nga mo-uswag sa panginabuhi sa kaugalingong paningkamot, sila maglihok usab alang sa pag-amoma sa kinaiyahan.
Roger Lanos, presidente sa grupo, namahayag nga maglihok ang ilang kahugpongan aron matabangan ang pagpakunhod sa sobrang pagka-alimoot sa kalibotan pinaagi sa pagtanom ug pag-amoma sa mga kahoy.
Maglihok usab sila nga aron mapanalipdan ug ma-amoma ang nahibilin pang mga kalasangan sa ilang dapit.
Gawas sa pagtanom og mga kahoy nga ang uban mga prutas, ang grupo, mag-mugna usab ug mga kalihokan ug mga proyekto nga makadugang sa ilang kinitaan.
Anaa sa plano sa grupo, ang paghimo ug mga produkto gamit ang uway, banig, paghimog sanina sa lumad nga Mandaya, paghimog mga lumadnong instrumento sa musika ug uban pa aron mapreserba ang ilang talagsaon nga kultura, tradisyon, ug sa ilang mga kahibalo ug mga pamaagi sa pagkinabuhi.
Ang amomahon nga kinaiyahan sa grupo mao ang mga dapit sakop sa Barangay Taocanga dinhi nga lungsod nga naglangkob sa Sitio Limintuug, Sitio Matabang diin anaa nahimutang ang Lake Diomaboc ug uban pang kasikbit nga dapit padulong sa Barangay Lambog ug uban pa. (Cesar Lanos)
20