HYBRID Electric Road trains ipatuman diri sa dakbayan sa Sugbo isip transportasyon sa masa.
Gipirmahan ang Memorandum of Understanding tali sa Department of Science and Technology (DOST) og dakbayan sa Sugbo diin eapil ang pagamit unya sa hybrid electric road trains lakip sa mass transport system.
Matud ni Cebu City Mayor Michael Rama muhaom ang hybrid electric road trains sa lain pang systema sa mass transport nga mao ang bus rapid system o BRT.
Nasayran nga supak ang dakbayan sa sugyot sa national nga panggamhanan nga magbutang unya og Light Rail Transit o Metro Rail Transit sa dakbayan.
Matud ni Rama, supak sila tungod kay madaot niini ang natural nga landscape, skyline, kalikupan og dako kini og gasto unya sa pagmantiner. Matud pa sa transport plan sa dakbayan gikinahanglan nga ang mapili nga sistema nagdagan og gamay lang nga enerhiya og dako ang kapasidad sa pasahero.
Gipasabot ni DOST Secretary Mario Montejo nga ang hybrid electric road train susama lang sa bus, mas taas kini og mas paspas. Gipadagan kini sa kuryente og gamay ra ang gigamit nga diesel mao nga luwas kini sa kalikupan.
Ipatuman unya ang pagtesting sa maong systema sa di pa mahuman ning tuiga. Ang mass transport system, usa sa mga nag unang proyekto sa dakbayan aron sa pagsulbad unya sa problema sa traffic. (Ferliza C. Contratista)
20
