GENERAL SANTOS CITY (Mindanao Examiner / Oct. 2, 2012) – Hindi pa nakuntento bilang congressman ay isinabong pa ni Manny Pacquiao ang kanyang asawang si Jinkee na naghain kanina ng kanyang kandidatura bilang vice governor ng Sarangani province sa Mindanao.
Magkasabay sina Jinkee at Manny na naghain ng kanilang mga certificates of candidacy sa Commission on Elections sa naturang lalawigan, at gayun rin si Sarangani Vice Governor Steve Solon na tatakbo naman bilang governor sa ilalim ng grupong People’s Champ Movement ng mambabatas.
Si Manny ay muling sasabak sa halalan bilang reelectionist sa sariling grupo.
Ikinagulat ng marami ang biglang pagpasok ni Jinkee – na dating sales lady ng isang cosmetic product sa General Santos City – sa pulitika dahil hindi naman ito nabalita sa media at wala rin itong sinasabi ukol sa kanyang plano.
Ngunit hindi kay Jinkee nagtapos ang isyu at may balita na maging ang kapatid umano ni Manny na si Rogelio ay tatakbo rin congressman sa General Santos City.
Hindi naman mabatid kung ano ang plano ni incumbent Sarangani Governor Migs Dominguez na ngayon ay nasa ikatlo at huling termino na. May bulungan na target ng bilyonaryong si Manny ang pagka-Pangulo sa 2016, ngunit ngayon pa lamang ay nagging isyu na ang political dynasty sa pamilyang Pacquiao. (Mindanao Examiner)
20